Тохсунньу 14-16 күннэригэр элбэх оҕолоохторго сири биэрии ыытыллар

Дьокуускай куорат Олохтоох дьаһалтатын пресс-сулууспата иһитиннэрэринэн, Сир сыһыаннаһыыларыгар агентство элбэх оҕолоохторго учаастактары биэриини салҕыыр. 
Бу сырыыга Бүлүүлүүр суол 16-17 км оҥоһуллубут учаастактары биэрэллэр. Оттон куорат бу оройуонугар сиртэн аккаастанааччылар кэлэр тыырыыны күүтэр бырааптаахтар. 
Ол курдук, тохсунньу 14 күнүгэр 150 ыал ыҥырыллыбытыттан, 52 киһи кэлбит. Учаастактарын талбыт дьоҥҥо хамыыһыйа чилиэннэрэ сир миэстэтин, уратытын сиһилии быһааран, көрдөрөн биэрдилэр, докумуоннаһыыга консультация оҥордулар. 
Сэрэбиэй ыытыллар миэстэтэ уонна бириэмэтэ: Дьокуускай к., Октябрьскай уул., 20/1, 3-с этээс (каб. 303), сарсыарда 09.00 чаастан күнүс 13.00 чааска диэри.