Тоҕо  оҕоломмотторуй?

Ол иһин 1941 сыл сэтинньи ыйыттан Сэбиэскэй Сойууска кэргэнэ, оҕото суохтар нолуок төлүүр буолбуттар. Бу нолуок хамнас 6 бырыһыаныгар тэҥнэһэрэ. Сэрии толоонугар 40-ча мөлүйүөн эдэр-сэнэх дьоммут оҕуннаҕа. Онтон итэҕэһэ суох киһи  тыылга хоргуйан, ыалдьан суорума суолланнахтара. Ол эрээри 1959 сыллаахха сахалартан, калмыктартан ураты омуктар нэһилиэнньэлэрин ахсаанын чөлүгэр түһэрбит этилэр. Элбэх ахсааннаах омуктарбыт тоҕо эрэ ууһуу сатаабаттар. Арааһынай пособиеларынан маанчыктыы сатыыллар да, үлэ үллэҥнээн барбат.

Арассыыйа үрдүнэн саатар Саха сирин олохтоохторун курдук (биһиги  сэттис миэстэбит) оҕолоноллоро буоллар, нэһилиэнньэ сыл аайы кырата балтараа мөлүйүөнүнэн эбиллиэ этэ. Тоҕо оҕоломмотторуй, биричиинэтэ тугуй?

Мин убайдарым бу дойдуттан бэйэлэрин иэстэрин толорон барбыттара. Аҕыстыы оҕоломмуттара. Эмээхсиним биһикки икки эрэ оҕоломмуппут, бэйэбитин эрэ солбуйар. Ол бэйэтэ төрүөттээх. Оҕолонон баран эмчиттэр алҕастарыттан сыыстаран, 28 сааһыттан 82 сааһыгар диэри эрэйи көрө сылдьаахтаабыта...

Бу сэриигэ эмиэ киһибит аҕыйаҕа охсуулааҕа билиннэҕэ буолуо. Көҥүл өттүнэн сэрии уотугар барбыт дьоммут дурда-хахха буоллулар, быыһаатылар.

Мантан сиэттэрэн бу курдук этиилээхпин: тыыннаах ордон кэлбит дьоммут үчүгэйдик эмтэнэллэрин туһугар федеральнай испииһэк олохтуохха. Кинилэри кытта ол босхо эмтэнии испииһэгэр тыһыынчаттан эрэ тахса ордон сылдьар тыыл бэтэрээннэрин киллэриэххэ. Оччоҕо көмүскээччилэрбит үчүгэйдик эмтэнэн, доруобуйаларын тупсаран, олох-дьаһах оҥостон, оҕолонон-урууланан, удьуордарын ууһатыа этилэр.