«Тоҥ балык-2025» күрэх кыайыылаахтара 150 тыһ. солк. наҕараадаланнылар

«Хамаанданы билиһиннэрии» номинацияҕа бастыҥ ааты көрөөччү уонна дьүүллүүр сүбэ бигэ биһирэбиллэринэн Жатай уокуругун 8 №-дээх хамаандата, 8 оҕолоох Алеся, Сергей Голиковтар ылан, 50 тыһ. солк. суумалаах сэртипикээтинэн наҕараадаланнылар.

«Скорость строгания»  балыгы түргэнник кыһыыга сымса, түргэн туттуулаах Дьокуускай куорат Киин түөлбэтин хамаандата Айна уонна Николай Слепцовтар инники күөҥҥэ тахсаннар, 80 тыһ. солк. сэртипикээти туттулар.

Балыгы хаачыстыбалаахтык кыспыт «Якутскэнергосбыт» хамаандатыгар «Качество строгания» ааты иҥэрдилэр, 100 тыһ. солк. сэртипикээти туттардылар.

Оттон «Тоҥ балык-2025» куонкурус муҥутуур кыайыылааҕынан Нам улууһуттан сылдьар Любовь уонна Александр Михайловтар дьиэ кэргэттэрэ буолла. Кыайыылаахтар 150 тыһ. солк. сүрүн бирииһи ылан үөрдүлэр-көттүлэр.

Тэрийээччилэр быйыл бастыҥ ыалдьааччыга биир куул Ньидьили соботун туруорбуттара көрөөччүлэр көхтөрүн уһугуннаран, ыһыыны-хаһыыны, ытыс таһыныытын ордук сытыырхатан биэрбиттэрэ биир умнуллубат түгэн буолла. Ол курдук 16 хамаанда ыалдьааччыларыттан ордук оҥостон кэлбит, куонкурус тухары ыалдьар хамаандаларын сылаастык ураатыы көрсөн күрэҕи тыҥааһыннаабыт күүстээх ыалдьааччыларынан Русскай Устье нэһилиэгин бэрэстэбиитэллэрэ ааттаннылар, куул соболорун сонно сыанаттан туттулар.