Тимир көлөлөөхтөргө

Эрдэ төлөһөөччүгэ – чэпчэтии

Суол быраабылатын (ПДД) кэһэн ыстарааптаннахха, эрдэ төлөһөр ордук. Ыстыраап анаммытын кэнниттэн 30 күн иһинэн төлөөччү 25% чэпчэтиинэн туһанар. Ол эрээри итинник чэпчэтии бары көрүҥ кэһиигэ дьайбат. Холобур, арыгы иһэн баран түбэһиигэ уонна сорох көрүҥҥэ быраабыланы иккистээн кэһэн түбэстэххэ, дьайбат.

Ыстыраап анаммытын кытта сөпсөспөт буоллахха

Суолга турар автоматика эрэсиимигэр үлэлиир камера көрдөрүүтүгэр олоҕуран ыстырааптанан баран, ону олоҕо суоҕунан ааҕар, ылыммат түгэҥҥитигэр, ыстараап анаммыта 10 календарнай күн иһинэн Судаарыстыбаннай өҥө порталын нөҥүө утарсар (обжаловать) бырааптааххыт.

Камера суол быраабылатын кэһиини “туппут” түгэнигэр,  кибитээнсийэҕэ суруллар УИН сыыппара 188105 уонна 188101 диэнтэн саҕаланар. Итинтэн атын ыстыраабы түһэрбит биэдэмэстибэҕэ эбэтэр оройуон суутугар тиийэн быһаарсыллар.

ОСАГО-та суох айаннаама!

Бу 2025 сылтан саҕалаан ОСАГО-та суох айанныы сылдьан иккистээн түбэспиттэргэ саҥа ыстыраап олохтоммут. Кээмэйэ 3-тэн 5 тыһ. солк. диэри халбаҥныыр.

«Госуслуга Авто» сыһыарыыны туһан!

Сиэп төлөпүөнүгэр хачайданар “Госуслуги Авто” диэн РФ Сыыппара министиэристибэтэ бигэргэппит анал сыһыарыытын туһаныахха сөп. Оччотугар СТС-ы уонна тимир көлөнү ыытар быраап электроннай көрүҥүн көрдөрөр кыахтанаҕын. Ону таһынан “европротоколу” толоруу, ОСАГО-нан кэмпэнсээссийэни ылыы судургутуйар.

Өссө биир туһалаах киллэрии

Үөһэ суруллубут “Госуслуги Авто” уонна “Госуслуги” сыһыарыыларга “Тимир көлөнү бас билээччигэ үөскээбит кыһалҕа туһунан биллэрии“ диэн саҥа дьаһаныы (функция) баар буолла. Ону туһанан, “Госуслугаҕа” баар дьон массыыналаах киһиэхэ иһитиннэрии ыытар кыахтаннылар. Холобур, парковкаҕа туруорбут массыынаҕынан тахсан бараары гыммытыҥ атын массыына бүөлүү турунан кэбиспитэ, биитэр киһитэ суох массыына сигнализацията холбонон баран, тохтоло суох тыаһаан дьону уйгуурдара эмиэ баар буолар. Эбэтэр, куһаҕанын эттэххэ, тахсаары алҕас атын массыынаны таарыйан, кырааскатын дьуккурутан кэбиһиэххэ сөп. Оннук түгэҥҥэ уонунан-сүүрбэччэнэн этээстээх дьиэҕэ буолуохтааҕар, биир этээстээх дьиэҕэ ол массыына хаһаайынын булар күчүмэҕэй. Туһунан төбө ыарыыта. Күнү дуу, түүнү быһа күүтэн олорор кыах суох. Дьэ, оннук түгэҥҥэ массыына нүөмэринэн көрөн, киниэхэ иһитиннэрии ыытар кыах баар буолбут. Онуоха иһитиннэриини ыытааччыга массыынаны бас билээччи дааннайа (кимэ-туга) олоччу тахсан кэлбэт эрээри, тустаах киһи  аккаунугар тиийэр. Иһитиннэриини ким ыыппыта эмиэ көстүбэт.