Тимир көлөлөөхтөр истиилэригэр

Суолга турар камералар көмөлөрүнэн, ОСАГО кыраҕы хараҕа кэтиир, ол эбэтэр быһа бэрэбиэркэлиир буолуоҕун сэрэппиттэр. Мантан инньэ суолга туруоруллубут камералар ааһан иһэр массыыналар нүөмэрдэринэн сирдэтэн, ОСАГО полиһын дьайар болдьоҕо ааспытын-ааспатаҕын  “көрөр” буолаллар.

Полиһа суох айанныы сылдьары быһаардахтарына, суоппар 800 солк. ыстырааптанар. Иккистээн оннук түбэһиитигэр ыстыраап суумата үрдээн, 3 тыһ. солк. саҕалаан, 5 тыһ. солк. тиийиэн сөп.

Маныаха биири бэлиэтээбиттэр: биир суукка иһигэр биирдэ ыстырааптанар. Ол аата, холобур, ол күн хас  аттынан ааспыт камератын устуутун аайы ыстырааптанан испэт. Онон сарсыныгар эмиэ камераҕа хабылыннаҕына, ол кэнниттэн да полиһы ылбатаҕына суукка аайы ыстарааптанарыгар тиийэр бадахтаах.  

Бу сонун киллэрии эспэримиэн (тестовый режим) быһыытынан саҕаланара буолуо, техническэй өттүнэн ситэ кыалла илик диэбиттэр.

Ол да буоллар, таҥара сэрэҕи таптыыр дииллэринии, эрдэ-сылла полистаммыт ордук.

Манна даҕатан эттэххэ, Дьокуускайга Россгострах филиала сабыллыбыт. Ол эрээри полиһы саайтарыгар киирэн, онлайн төлөөн, эрэйэ суох болдьоҕо ааспыт полиһы саҥардыахха сөп. Элбэх бириэмэни ылбат, табыгастаах. 

Тырааныспарыҥ нолуогун төлүүргүн умнума!

2025 сыллааҕы тырааныспар нолуогун кибитээнсийэлэрэ, уведомлениелара кэлитэлээн эрэллэр. Бу алтынньы ыйынан Федеральнай нолуок сулууспата итинник биллэрэри, санатары түмүктүө. Ханнык эрэ төрүөтүнэн иһитиннэрии кэлэ илик түгэнигэр чопчулаһаргыт ордук. ФНС саайтыгар, сыһыарыытыгар биитэр Судаарыстыбаннай өҥө порталыгар киирэн көрөртөн саҕалааҥ. Сорохторго почтанан ыытыллыбыт буолуон сөп.

Нолуогу бу дьыл ахсынньы 1 күнүгэр диэри олоччу төлөһөн бүтүөхтээххитин умнумаҥ.

Ол кэнниттэн пени ааҕыллыбытынан барыаҕа.  Чуолаан бэнсиинтэн гаас-мотуор уматыгар көспүт уонна 50 бырыһыаннаах чэпчэтиинэн туһанар кэмнэрэ бүппүт (уларытыы кэнниттэн 5 сыл дьайар) дьон, болҕомтолоох буолуҥ. Суумата үрдээбитигэр эбии пени төлүүр кыһалҕаламмат курдук, эрдэттэн төлөһөргүт ордук.