Тимир көлөлөөх, эппиэтинэскин умнума!

Дьокуускай куорат суолунан сырыыны кэтээн көрөр сулууспата (ДПС) ахсынньы 21 күнүгэр диэри үлэтин күүһүрдүбүтэ биһирэнэр. Халлаан хараҥатыгар эбии туманнаах күннэр тураллар. Сэрэхтээх буолуу ирдэбилэ күүһүрүөн наада.

Ол да буоллар, хомойуох иһин, тимир көлөлөөхтөр суол быраабылатын кэһэр түбэлтэлэрэ тахса турар. Дэлэҕэ, баара эрэ бу ааспыт субуоталаах өрөбүл иһигэр 400-тэн тахса суолунан айан быраабылатын кэһии иһин 441 боротокуол толоруллуо дуо?! Ити – өссө тутуллубута, биллибитэ буоллаҕа. Ыстараап да көрүллүүтэ улаханнык өйдөппөт чинчилээх. ДПС иһитиннэрбитинэн, тимир көлөнү холуочук туруктаах, арыгы иһэн баран ыыта сылдьар 30 суоппар харытыттан харбаппыт. Кинилэр истэригэр үс киһи иккистээн түбэһиилэрэ буолан, холуобунай дьыала көбүтүллэр туруктаах. 22 массыына штрафстоянкаҕа туруоруллубут. Уодьуганнаммыттар ортолоругар ОСАГО полиһа суох сылдьар 54 суоппар, суол быраабылатын бэлиэтин эбэтэр суол быраабылатын баардылаабакка айанныыр 53 киһи, массыынаҕа олорооччу кэтиэхтээх курун иилиммэтэх 63 айанньыт киирбит.

Аны, оптуобус тохтобулга аарыырыгар бэлэмнэммит анал сирдэргэ («кармааҥҥа») эбэтэр сырыылаах суол кытыытыгар тимир көлөлөрүн хаалларан баран сүтэн хаалар суоппардар суох буолбатахтар (хаартысканы көр). Итинтэн сылтаан айан бытаарар, суол саахала, дьон эчэйэр куттала улаатарын долоҕойдоругар тохтоппотторо бэркиһэтэр.

Хаартыска: Вконтакте ГорСреда аһаҕас былаһааккатыттан