Тииҥ суорҕан

Түмэл 1974 сыллаахха К.Д. Уткин көҕүлээһининэн арыллыбыт. Баай пуондалаах, элбэх ураты экспонаттаах. 2019 сылтан саҥа дьиэҕэ көһөн үлэлиир.

Прасковья Семенова, түмэл билим-чинчийэр салаатын сэбиэдиссэйэ:

– Биһиги түмэлбит биир киэн туттар экспонатынан XX үйэ 40-с сылларыгар тигиллибит тииҥ суорҕан буолар. Экпонат 187 х 123 см кээмэйдээх, 392 устуука тииҥ кутуругуттан, 62 саһыл тыһыттан, 4 саһыл кутуругуттан тигиллибит. Экспонаты түмэлгэ Яковлевтар дьиэ кэргэн 2021 сыллаахха биэрбитэ. Суорҕан хаһаайына – дьиэ кэргэн аҕа баһылыга Ян Алексеевич Яковлев, Ньурба улууһун уонна Октябрьскай нэһилиэк бочуоттаах олохтооҕо. СӨ үөрэҕириитин туйгуна, тыатын хаһаайыстыбатын бочуоттаах бэтэрээнэ, СӨ бочуоттаах Ытык кырдьаҕаһа. Ян Алексеевич 7 сааһыттан сайын аайы «Кыым» холкуоска үлэлээн улааппыт. Аҕата 1943 сыллаахха Сталинград кырыктаах кыргыһыытыгар охтубут. Тулаайах хаалбыт 10 саастаах уолу эһэтэ Никифор Яковлев иитэ ылбыт. Кини кыра уола Петр эмиэ сэриигэ ынырыллан барбыт. Ийэтэ бу суорҕаны кыра уолугар анаан тигэн саҕалаабыт. Хомойуох иһин, Петр сэрии бүтүө аҕыйах хонук хаалбытын кэннэ, 1945 сыл муус устар 27 күнүгэр, Чехословакияҕа өлбүт. Ол иһин эбэтэ суорҕаны ситэри тигэн баран, сиэнигэр Яҥҥа биэрбит. Ян дьиэ кэргэнэ бу сыллар тухары  суорҕаны харыстаан уура сылдьыбыт уонна биһиги түмэлбитигэр туттарарга санаммыт.