Тиэргэннэри тупсарыыга олохтоохтор санаалара учуоттанар

Куорат баһылыга Евгений Григорьев «Прямой эфир с городом» быһа биэриигэ иһитиннэрбитинэн, Дьокуускайга «1000 тиэргэн» федеральнай бырагырааманан барыта 161 тиэргэн өрөмүөннэммит.

«2021 сыллаахха Ил Дархан Айсен Николаев өйөбүлүнэн «Мин тиэргэним» бырагырааманы саҕалаабыппыт. Салгыы «1000 тиэргэн» федеральнай бырагыраамаҕа холбоһон, ол көмөтүнэн үс сыл иһигэр былааннаммыт 45 тиэргэн оннугар 161 тиэргэн тупсарылынна. Бу кэм устата 30 тыһыынча кэриҥэ киһи олорор тиэргэнэ өрөмүөннэннэ.

Бырагыраама үлэтэ салҕанар, тоҕо диэтэххэ бу куорат олохтоохторугар олус суолталаах. Быйыл 18 тиэргэҥҥэ хапытаалынай өрөмүөн ыытыллар. Температура эрэсиимэ ирдэнэр үлэ барыта түмүктэммитэ», – диэтэ Евгений Григорьев.

Куорат баһылыга бэлиэтээн эппитинэн, тиэргэннэри тупсарыы үлэтэ олохтоохтор быһаччы кыттыыларынан салгыы ыытыллыаҕа. Манна даҕатан эттэххэ, тиэргэни тупсарыы бырайыагар олохтоохтор бэйэлэрэ этии киллэрэллэр, кинилэр санаалара хайаан да учуоттанар.

Хаартыскалар: «Киин куорат» хаһыат архыыбыттан