«Тэтим» араадьыйа хапсаҕайа

Аҕа дойду сэриитигэр Улуу Кыайыы 80 сылынан уонна «Саха араадьыйата» төрүттэммитэ 95 сылынан  араас өйдөбүнньүк дьаһаллар ыытыллаллар.

Аҕыйах хонуктааҕыта «Тэтим» Саха араадьыйатын хапсаҕайга турнира В.П. Керемясов аатынан тустууга аналлаах 3 №-дээх оҕо спорт оскуолатын көбүөрүгэр тэрилиннэ. Өрөспүүбүлүкэ хапсаҕайдьыттара түмсэн икки ыйааһыҥҥа – 75 кг уонна 75 кг үөһэ – ким үчүгэй бэлэмнээҕин, күүстээҕин быһаарыстылар. Сүрүн судьуйанан хапсаҕай маастара, чөмпүйүөнэ, тренер Станислав Афанасьев үлэлээтэ. Хапсыһыылары комментатор Александр Васильев – Көрдүгэн кэпсээн-ипсээн сэргэхситтэ.

«Тэтим» Саха араадьыйатын дириэктэрэ Николай Бястинов бу күрэхтэһии аан бастаан Арассыыйа араадьыйатын күнүгэр уонна сибээс үлэһиттэрин күнүгэр сөп түбэһиннэрэн ыытыллыбытын, «Саха араадьыйата» төрүттэммитэ 95 сыла сэтинньи 7 күнүгэр буоларын, онуоха диэри кэнсиэрдэр, куонкурустар курдук араас дьаһаллар тэриллиэхтээхтэрин,  спорка күрэхтэһиилэри саҕалыыр хапсаҕайга өрөспүүбүлүкэ күүстээх маастардара  кытталларыттан астыммытын биллэрдэ. Турниры үбүлээбит «Мебель» тэрилтэҕэ, хапсаҕай федерациятын бэрэсидьиэнэ П.Д. Рахлеевка, А.А. Кузьмиҥҥа махтанна.

Тааттаҕа буолар Манчаары оонньууларыгар путевкалардаах бөҕөстөр дьарыктана таарыйа кэлэн кииристилэр. Бөҕөстөр хантан хааннаахтарын, кимтэн кииннээхтэрин, туох ситиһиилэрдээхтэрин, хапсыһыылар түгэннэрин комментатор Александ Васильев – Көрдүгэн кэпсээн-ипсээн билиһиннэрдэ, сэргэхситтэ.

Сытыы, кытаанах хапсыһыылар буоллулар. 75 кг Мэҥэ Хаҥаластан Владислав Кривошапкин финалга Хаҥалас күүстээх бөҕөһө Дмитрий Эспеги охтордо. Игорь Матвеев (Нам), Эрчим Ефимов (Муома) үһүс миэстэлэннилэр.

Ыарахан ыйааһыннаахтарга финалга  хапсыһыыга Мэҥэ Хаҥалас аатыттан тустар «Муома хайата» Никита Хабаров уонна Чурапчы чулуута Никита Софронов күөн көрсүһүүлэригэр кыайыыны Никита Хабаров ситистэ уонна сүрүн бириис 50 тыһ.солк. хаһаайынынан буолла. Никита Валеев (Дьокуускай), Эдуард Максимов (Нам) боруонса мэтээллэргэ тигистилэр.

Кыайыылаахтар уонна миэстэҕэ тиксибиттэр өйдөбүнньүк мэтээллэринэн, дипломнарынан, сыаналаах бириистэринэн, муҥутуур кыайыылаахтар 50 тыһ.солк. сүрүн бирииһинэн, иккис-үһүс миэстэлэргэ тиксибиттэр 20-15 тыһ.солк. биһирэннилэр.