Тэпилииссэ эмиэ хамсаабат хапытаал буолуон, өссө регистрация ирдиэн сөп

Маннык түгэҥҥэ бас билээччи дьаһалтаҕа биллэрэрэ эрэ буолбакка, бас билии быраабын Росреестрга регистрациялыыра ирдэнэр. Бу туһунан Москва уобалас даачалаахтарын сойууһун бэрэссэдээтэлэ уонна Госдуума дьокутаата Никита Чаплин «Газете.Ru» ханаалга быһаарда.

“Өскөтүн тэпилииссэ хапытаалынай акылаакка тутуллар уонна алдьаппакка көһөрүллүбэт буоллаҕына, сокуон быһыытынан хамсаабат хапытаал буолар. Бу түгэҥҥэ сокуон иһитиннэрии бэрээдэгин ирдиир – тутуу саҕаланыытын туһунан олохтоох дьаһалтаҕа уонна, түмүктэннэҕинэ, эбийиэги үлэҕэ киллэрии туһунан иһитиннэрии. Ол кэнниттэн бас билии бырааба Росреестр тэрилтэҕэ регистрацияланыан сөп. Тутуу хапытаалынай дуу, суох дуу – бу докумуон ирдэнэрин быһаарар сүрүн критерий буолар”, – диэн Чаплин быһаарда.

Ону тэҥэ, тэпилииссэ тимир ааркалартан тутуллубут буоллаҕына, сиргэ эрэ турар, баҕардаххына көһөрүллэр, кыһынын судургутук хомуллар, ыһыллар уонна, бетон акылаата суох буоллаҕына, регистрацияланара наадата суоҕун чуолкайдаан эттэ.

Чаплин өссө тэпилииссэлэр ыаллыы сир кыраныыссатыттан кырата биир миэтэрэ тэйиччи туруоруллуохтаахтарын санатта. Атын түгэҥҥэ, кини этэринэн, ыалгыт тутууну көһөрүүгэ эбэтэр уларытарга сууттаһыан сөп уонна оннук сокуоннай сууттаһар түбэлтэ баар диэн сэрэттэ.