Телеграм туттааччыларга сэрэтии

Түөкүттэр “барахсаттар” бу балаһыанньаны туһана охсон, мессенджер үлэтин түргэтэтэр туһунан дьоҥҥо этии киллэрэллэр.

Телеграмҥа хайыы үйэ буортулаах бот булуллубут. Ону мессенджергэ F6 информационнай куттал суох буолуутун исписэлиистэрэ булбуттар.

“Ботка киирэргэ, туһанааччыттан “робот буолбатахпын” диэн бигэргэтэригэр этэллэр. “Бигэргэтии” кнопканы баттаата да, туһанааччы төлөпүөнүн нүөмэрин дааннайын ботка үллэстэргэ сөбүлэһэр. Онтон бэрэбиэркэлиибит диэн туһанааччыга сымыйа бот ыыппыт биэс сыыппаралаах кодун киллэрэргэ көрдөһөллөр. Бу, дьиҥэр, телеграмҥа бэрэбиэркэни ааһары (авторизация) көҥүллүүр код. Ону “обход замедления” диэн бот форматыгар киллэрдэххинэ, түөкүттэр эн аккауҥҥар тута киириэхтэрэ, өскөтүн аккауҥҥар былыт парола холбоммотох буоллаҕына”, - диэн F6-ҕа Цифровой кутталтан харыстыыр ​​департамент аналитига Анастасия Князева эттэ.

Онон F6 аналитиктара Арассыыйа олохтоохторун сэрэхтээх буолалларыгар уонна түөкүттэр бу ньымаларыгар киирэн биэрбэттэригэр ыҥыраллар.