Тайах хаарын ыраастаары, 30 км айанныыр Аркадий Попов

Аркадий Иванович Горнай Аһыматыттан Бэрдьигэстээххэ диэри 3 көһү айаннаан, анаан-минээн тайах скульптуратын хаарын ыраастыыр буолбута үһүс сылыгар барбыт. Кини бу үтүө көҕүлээһинин кэргэнэ Ольга Егоровна, оҕолоро, сиэннэрэ бары өйүүллэр, аҕаларынан, эһэлэринэн киэн тутталлар.

Аркадий Попов, Аһыма олохтооҕо, 38 сыл ыстаастаах хачыгаар:

– Дьиэ кэргэнинэн манан дьарыктаммыппыт үһүс сыла. Улууспут ытык кыыла, бэлиэтэ хаарынан бүрүллэн турара көрөргө сүөргү курдук этэ. Ол иһин, хаар түстэ даҕаны, анаан тэринэн кэлэбин. Сороҕор кэргэним, оҕолор кэлсэллэр. Ыраастыы сырыттахха, айанньыттар махтаммыттыы сигналлаан ааһааччылар, хаартыскаҕа да түһэрбиттэр бааллара. Арай бу соторутааҕыта кэргэним видеоҕа устубута социальнай ситимҥэ тарҕанна быһыылаах.

 

Аркадий Иванович пааматынньык ааптарын кытта билсибэтин чуолкайдаан, «Киин куорат» салгыы скульпторга тахса сырытта.

Санатар буоллахха, тайаҕы Горнай аартыгар 2015 сыллаахха от ыйын 29 күнүгэр скульптор Нюргустана Филиппова гипсобетон матырыйаалтан оҥорбута. Киниэхэ кэргэнэ Николай Филиппов уонна кини быраата Дмитрий Петров көмөлөспүттэрэ.

Нюргустана Филиппова  –  скульптор, СӨ Култууратын туйгуна, П.П. Романов аатынан художественнай училище преподавателэ:

 – Тайахпытын ыраастыы сылдьар устууну көрөн олус долгуйдум.  Кыһыҥҥы кэмҥэ ити хайысханан айанныырым сэдэх. Пааматынньык таһыгар ыал бөҕө дьиэ туттубут этэ. Бастаан көрөммүн, кинилэр буоллахтара дии санаабыппын өссө соһуттугут, долгуттугут?! Олох атын дэриэбинэттэн кэлэн ыраастыыр киһиэхэ улахан махталбытын тириэрдэбит!

Быйыл Култуура сыла үүннэ. Саха сирин араас нэһилиэктэригэр баараҕай да, дьоҕус да скульптура элбэх. Олор бары даҕаны кыһын хаарынан саба бүрүллэн, кимнэрэ-туохтара биллибэккэ тураахтыыллар. Аһыма Поповтарын үтүө бачыымын салҕыыр санаалаах дьон бааргыт дуо?