Таптал кэрэһиттэрэ кубалар

Ол ааптарыныын бу сарсыарда билсэн, хаһан эрэ сөҕө-махтайа көрбүт фотограбым буоларын билэн, өссө долгуйуу туругар куустаран ыллым.

Ол курдук, ыраах Абый улууһуттан Анастасия Гаврильевна Сорокоумова түһэрбит хаартыскаларыгар тус хоту көтөрө-сүүрэрэ, үүнээйитэ киирбит эбит этэ.

Анастасия Сорокоумова, В.Н. Дохунаев аатынан Муҥурдаах орто оскуолатын учуутала:

– Абый улууһун Сыаҥааннаах нэһилиэгэр олоробун. Биһиги дэриэбинэбитигэр 2006-2008 сыллартан сыллата кубалар кэлэллэр. Ити сүүрбэччэ сыл буолла. Бастаан 2 куба этэ. Онтон сылын аайы элбээн испиттэрэ – 7, онтон 17 буолтара, кэлин 30-тан лаппа таҕыстылар. Биир сыл букатын да 52-гэ тиийэ аахпыппыт. Быйыл эмиэ 30-тан тахса куба дэриэбинэбит ыалдьыттарынан буолаллар.

Саас ахсын эдэрдиин-эмэнниин киирэммит көрсөбүт, аһатабыт. Бөһүөлэккэ ааһар суолга тахсар ууга түһэллэр. Итинник икки нэдиэлэ курдук сынньанан барар үгэстээхтэр. Аныгы үйэ сиэринэн төлөпүөҥҥэ хаартыскаҕа түһэрэр киһи элбэх. Онон социальнай ситимҥэ элбэҕи көрүөххэ сөп.

Мин бэйэм үлэм таһынан сөбүлүүр дьарыгым – хаартыскаҕа түһэрии. Манна Мииринэй улууһуттан Александр Петров куйаар ситимин нөҥүө үөрэппит үөрэҕин, биэрбит билиитин туһанан хаартыскаҕа түһэрэ үөрэммитим. Уонна ити «Саһарҕа хоптото» диэн хаартыска альбомун 2003 сыллаахха дьүөгэм Арылы Дуйдаах хоһооннорунан, мин хаартыскаларбынан бар дьоммор бэлэх ууммутум.