“Танцылыыр” баҕалара баһаам эбит

Суох буоллаҕа, ырааҕынан тумна сылдьарбыт.

Өйдүүргүт буолуо, оскуола танцытыгар, оччолорго “дискотека” дэммэт, “танцы” диир этибит, аҕыс эҥин чааска ахсыстартан алын кылаастары дьиэлэригэр үүрэллэр этэ. Онон уоҥҥа диэри эбитэ дуу, арааһа, тоҕус чааска эбитэ буолуо, 8-9-10 кылаастар эрэ хаалаллара. Биһигини үс сыл аҕа кылаастар наар үүрэллэрэ: “Дьиэҕитигэр барыҥ да барыҥ!” – диэн күргүйдээһин, үүрүү-түрүйүү буолара. Наһаа да үҥкүүлүү хаалыахпытын, улаата охсуохпутун баҕарарбыт.

Бэҕэһээ биһигиттэн түөрт сыл аҕа ыалым, эдьиийим бииргэ үөрэммит дьүөгэтэ бэрт дьиктини кэпсээн соһутта да, күллэрдэ да.

Кинилэри эмиэ үс сыл аҕалар кыйдыыллар эбит. Онуоха дьонуҥ үҥкүүлүүр баҕаттан биирдэ кылаастарын салайааччытын дьиэтигэр тиийэн үҥсүбүттэр: “Биһигини наар кыйдыыллар, баһаалыста, тиийэн кэпсэт эрэ”, – диэбиттэр. Онуоха учууталлара тиийэн улахан кылаас оҕолорун “стройдаппыт”, оҕолор үҥкүүлээтиннэр диэн буолбут. Онон онуоха-маныаха диэри субуота аайы син чаастарын уһатан үҥкүүлүүр буолбуттар. Онтон ол учууталлара кэтэхтэн үөрэҕэр барбытын кэннэ, дьэ, кэһэппиттэр; били “крышалара”, көмүскэһэр киһилэрэ суох буоллаҕа. Онон эмиэ эрдэ кыйдаммыттар. Онтон биирдэ, сүбэлэспиттэр да, дириэктэрдэригэр ойон тиийбиттэр. Арай киирбиттэрэ биир оҕотун суосканан аһата олорор, аттыгар биир оҕо ытыы турар үһү. Киирээт көрдөһүүлэрин эппиттэр: “Баһаалыста биһигини уһуннук танцылыырбытыгар көҥүллүөҥ дуо?” –диэн. Онуоха дириэктэрдэрэ дэлби күлбүт, аһыммыт да быһыылаах.  Сирэй-харах, дьүһүн-бодо бэрт күлүүлээх буолуо ээ. Оҥой-соҥой көрбүт сэттис кылаас оҕолоро буоллахтара. “Дьэ, хайдах көҥүллүүбүн?” – диэбит. Онуоха кэннигэр турар кыыстара: “Оттон сурукта суруй ээ”, – диэбит. Бу хорсуннарын көр, үҥкүүлүөх баҕа туох баар кутталы суох оҥорор эбит дьэ. Ол кэмҥэ хостон дириэктэр кэргэнэ тэтэрээттээх, уруучукалаах тахсан кэлбит. Онон дириэктэрдэрэ сурук суруйан оҕолорго туттаран, онтуларын үрүҥ былаах курдук тэлимнэтэн тиийэн көрдөрбүттэр. Ол кэмҥэ уолаттара (кэм да кыргыттар сытыыларын көр, иилээн-саҕалаан,  тыл көтөҕөн бардахтара) оскуола таһыгар хоочугураһа тураллар эбит. Хайыахтарай, дириэктэр суругун туппут дьону,  үүрбэтэхтэр. Ол да буоллар дэлби кыыһырбыттар, оттон сэттистэр үөрэ-көтө аҕыйах да мүнүүтэ буоллар үҥкүүлээн, астынан, бириэмэлэрэ туолан тарҕаспыттар.