Талаан-дьоҕур арыллыыта саастан тутулуга суох

Быйылгы бырааһынньыгы тэрийээччилэринэн уонна эппиэтинэстээхтэринэн Николай Александрович Тряпша салайааччылаах Дьокуускай куорат бэтэрээннэрин сүбэтин кытта Евгений Петрович Пермяков баһылыктаах Хатас нэһилиэгин  дьаһалтата, Валентин Азотович Чепалов дириэктэрдээх “Тускул” КК уонна Хатас нэһилиэгин бэтэрээннэрин сүбэтэ буоллулар. Бэтэрээннэр бу күүтүүлээх-кэтэһиилээх күҥҥэ ох курдук бэлэмнэнэн, ыһыах ыытыллар сирин-уотун таптыы-харыстыы киэргэтэн, дьиҥнээхтии сылаас, бырааһынньыктааҕы эйгэни тэрийдилэр.

Хаһан даҕаны буоларын курдук  бу тэрээһин хас биирдии Саха сирин олохтооҕун сүрэҕэр-дууһатыгар олус кэтэһиилээх, долгутуулаах, туох эрэ дьиктини-кэрэни, үтүөнү күүтүүлээх. Бу күн туһугар күннэри-түүннэри бэлэмнэнии, сүпсүгүрүү, сүүрүү-көтүү, улаҕа диэки ууруллубут, кэтэҕириин диэки кистэммит бородуукталары хостоон эгэлгэ аһы астааһын, күннээҕи түбүккэ ыктаран ситэриллибэтэх ииһи-күүһү ситэрии-хоторуу, киэргэли-симэҕи ыраастааһын буолла. Дьэ манна буолла Саха норуодунай суруйааччыта Наталья Харлампьева ойуулаабыт көстүүтэ – саҥа былаачыйа, көмүс ытарҕа, саҥа былаат, солкоҕо сууланыы, күлүмүрдүүрү иилинии, күндү түүлээҕи бүрүнүү.

Этиллибит чааска, болдьоммут бириэмэҕэ бииртэн биир толору тиэммит оптуобустар хаамардыын сыыдамсыйбыт, харахтарын уота умайбыт, көрсүһүүттэн кэрэтийбит, сэргэстэһииттэн сэргэхсийбит аҕам саастаахтарбытын аҕалтаатылар. Бэрт сотору ытык Сиэллээх Аартык сирэ кустук араас өҥүнэн күлүмүрдээтэ, чэчик өҥүнэн суһумнаата. Тэрээһин туһунан былааннааһын-торумнааһын үлэни эрдэттэн ыытыллыбыт буолан, мунуу-тэнии, буккуллуу суох.

Бырааһынньык бэтэрээннэр сэлэлии хааман киириилэринэн саҕаланна, ол кэннэ “Тускул” КК бэлэмнээбит сценарийынан ыһыах арыллыытын сиэрин-туомун толоруута буолла. Ыһыах быйылгы сылга Арассыыйаҕа биллэриллибит Норуоттарын сомоҕолоһууларын уонна Сахабыт сиригэр Култуура сылларын чэрчитинэн барда. Ыһыах үгэс буолбут оһуохайынан арылынна. Ол кэннэ бырааһынньык кыттыылаахтарын уонна ыалдьыттарын «Дьокуускай куорат» куораттааҕы уокурук баһылыгын солбуйааччы Владимир Аржаков, Өрөспүүбүлүкэтээҕи бэтэрээннэр сэбиэттэрин бэрэссэдээтэлэ Аркадий Саввинов, управление салайааччыта Матрена Анемподистова, СӨ Судаарыстыбаннай Мунньаҕын (Ил Түмэн) Бэрэссэдээтэлин солбуйааччы Антонина Григорьева уонна Дьокуускай куорат Дууматын бэрэссэдээтэлин бастакы солбуйааччыта Евдокия Евсикова эҕэрдэлээтилэр. Хас биирдии эҕэрдэлээччи салайааччы олоххо көхтөөх, кырдьары-сорсуйары билиммэт бэтэрээннэргэ наҕараадатын туттарда.

Дьэ ити кэннэ дьахтар уонна эр киһи национальнай көстүүмнэрин, өттүк киэргэлин, хаппар суумкалары көрүүлэр, сэлэлии хаамыы холуоннатыгар, киэргэтиигэ, о.д.а. күрэхтэр ыытылыннылар.

Ыытыллыбыт күрэстэр талаан-дьоҕур арыллыыта-аһыллыыта саастан тутулуга суох буоларын толору дакаастаатылар. Саҥа ааттар ааттаннылар, сонун оҥоһуктар көһүннүлэр.

Манна орто сааһын ааһан баран быысыпка эйгэтин арыйбыт Хатас нэһилиэгин олохтооҕо Бүөтүр Уйбаныап аата дорҕоонноохтук ааттанна, Табаҕа сэлиэнньэтин  олохтооҕо Любовь Федотова сибиинньэ хабаҕыттан оҥорбут хаппар суумката, аҕыс уонун ааһан да баран иннэни-сүүтүгү ыһыктыбакка сылдьар Екатерина Кононовна Кириллина үгэскэ киирбит иискэ билиҥҥи кэм тыынын олус табыгастаахтык туттубута, Надежда Максимова, Наталья Васильева, Клавдия Николаева, Александра Дмитриева, Александра Платонова уонна да атыттар сырдык санаа сыдьаайын киллэрдилэр. Күрэстэр икки ардыларыгар хас биирдии уокурук, Дьокуускай куорат тулатынааҕы нэһилиэктэр бэтэрээннэрин күүһүнэн эҕэрдэ ырыалар эйээрэ көттүлэр, үҥкүүлэр көһүннүлэр.

Дьэ ити курдук биир тыынынан, ылбыт тэтими ыһыктыбакка, бииртэн биир  тэрээһин ааһан, тарҕаһыы түгэнэ кэлбитин билбэккэ да хааллыбыт. Түмүкпүтүгэр бэтэрээннэрбитигэр хас биирдиилэригэр үгэстэри харыстыыргыт, олоххо көхтөөх сыһыаҥҥыт уонна куораппыт уопсастыбаннай олоҕор кыттаргыт иһин махталбытын тиэрдэбит.