Тааттаҕа ыытыллаары турар XXII Манчаары оонньууларын сыыппаралара

Спартакиада от ыйын 7 - 12 күннэригэр ыытыллыаҕа.

Манна 7 тыһыынча кэриҥэ киһи спорт уонна култуура араас тэрээһиннэригэр кыттыаҕа. Ыытыллыбыт сүүмэрдээһиннэр түмүктэринэн 1662 спортсмен кэлиэҕэ. 
Оонньууларга анаан Ытык Күөлгэ 1000 миэстэлээх трубинулаах А.Е.
Турнин аатынан «Ньургун Боотур» элбэх функциялаах комплекс, 1500 көрөөччү миэстэлээх «Саһыл уйалаах» ипподром, маны сэргэ Култуура уонна сынньалаҥ паарката тутулуннулар. 
Кыттааччылары 19 сиринэн олохтуурга, 13 сиринэн аһатарга бэлэмнэр. Туһааннаах куонкурус түмүгүнэн аһылык боппуруоһун хааччыйыыга сүрүн операторынан «Сэргэлээх» аһылык кэмбинээтэ анаммыта. Күрэхтэһиилэр кыайыылаахтарын 924 устуука мэтээл күүтэр: 620 – улахан, 156 – кыра, 148 – тренердэргэ.
Оонньуулар бырагыраамаларыгар спорт 11 көрүҥэ киирэр: хапсаҕай, мас-рестлинг, сахалыы атах оонньуута, сүүрүү, сахалыы, хотугулуу төрүт көрүҥнэр, остуол оонньуута, гиирэ спорда, буулдьанан ытыы, сахалыы оҕунан ытыы, ат сүүрдүүтэ. 
«Манчаары оонньуулара» спорт национальнай көрүҥнэригэр күрэхтэһии хас 4 сыл аайы ыытыллар (Ил Дархан уонна Бырабыыталыстыба пресс-сулууспатын матырыйаалларынан).