Тааттаҕа күрэс төрүт көрүҥнэригэр XXII «Манчаары оонньуулара»

Ытык Тааттаҕа от ыйын 7-12 күннэригэр күрэс төрүт көрүҥнэригэр XXII «Манчаары оонньуулара» ыытылла тураллар. Бу «Саха сирин олимпиадата» дэммит, өбүгэ саҕаттан оонньонор, үгэскэ олоҕурбут спартакиада – барыбыт үөрүүбүт, кэтэспит күрэспит.

Манна 7 тыһыынча кэриҥэ киһи спорт уонна култуура тэрээһиннэригэр кыттар. Ыытыллыбыт сүүмэрдээһиннэр түмүктэринэн 1662 күрэсчит кэллэ.

Оонньууларга анаан Ытык Күөлгэ 1000 миэстэлээх трибуналаах А.Е.
Турнин аатынан «Дьулуруйар Ньургун Боотур» элбэх функциялаах комплекс, 1500 көрөөччү миэстэлээх «Саһыл уйалаах» ипподром, маны сэргэ Култуура уонна сынньалаҥ паарката тутулуннулар. Олохтоохтор көҕүлээһиннэринэн, тэрилтэлэр кыттыылаах субуотунньуктар ыытылыннылар. Бу барыта Ытык Тааттаҕа үйэ чиэппэрэ кыратык тахсар кэмҥэ иккис төгүлүн ыытыллар «Манчаары оонньууларыгар” туһаайылынна.

Кыттааччылары 19 сиринэн олохтоотулар, 13 сиринэн аһаталлар. Туһааннаах куонкурус түмүгүнэн аһылык боппуруоһун хааччыйыыга сүрүн операторынан «Сэргэлээх» аһылык кэмбинээтэ анаммыта.

Оонньуулар бырагыраамаларыгар спорт 11 көрүҥэ киирэр: хапсаҕай, мас-рестлинг, сахалыы атах оонньуута, сүүрүү, сахалыы, хотугулуу төрүт көрүҥнэр, остуол оонньуута, гиирэ спорда, буулдьанан ытыы, сахалыы оҕунан ытыы, ат сүүрдүүтэ.

От ыйын 8 күнүгэр киэһэ 20.00 чаастан бу күн аһыллыбыт «Дьулуруйар Ньургун Боотур» стадиоҥҥа Оонньуулар үөрүүлээх аһыллыылара Олоҥхо тыйаатырын сүрүн режиссера, Былатыан Ойуунускай аатынан Саха академическай тыйаатырын артыыһа Роман Дорофеев туруоруутунан барда. Манна Үөһэ Айыылар маанылаан айбыт ытык сирдэригэр уһун тыыннаах үрэх күүһүнэн, кини салгынын сабыдыалынан айар-тутар дьоҕурдаах, саханы саха дэппит, уран тыл баайдаах улуу дьоммут төрөөбүт түөлбэлэрэ буолара кэпсэннэ. Саҥа үйэ кэмин уолчаана саха сиэринэн эһэтин оҕонньор үөрэҕинэн олоххо уһуйуллуута көрдөрүлүннэ. Саха олоҕун көрдөрөр уон икки туос кэрдиистээх үөрэххэ өбүгэ үгэһэ, төрөөбүт тыл, үөрэх-үлэ, чэгиэн буолуу, Олоҥхоҕо хоһуллар Ньургун Боотур хараҥаны кыайыыта, ыччат дьон биир санааланыыта барыта ойууланна. Эһэ үөрүйэҕин, кини өркөн өйүн, күүһүн-күдэҕин, муудараһын көрдөрүү – бу саха омук үүнэрин-сайдарын туоһута.

Күрэс улахан бырааһынньыгын аһыллыытыгар өрөспүүбүлүкэ, Дьокуускай куорат хамаандалара сэлэлии хааман киирдилэр. Оонньууларга тутаах эппиэттээх Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Сергей Местников араапарын кэннэ Ил Дархан Айсен Николаев,  Кыргызтан миниистирдэрин кэбиниэтин бэрэссэдээтэлэ Эдиль Байсалов, Арассыыйа спорка министиэристибэтиттэн Максим Уразов, Таатта улууһун баһылыга Айаал Бурцев, XXII «Манчаары оонньууларын» аһыллыытынан эҕэрдэлээтилэр уонна махталларын биллэрдилэр.

Көлүөнэ ситимин көрдөрөр, өбүгэ саҕаттан сайдан кэлбит күрэс төрүт көрүҥнэрин Оонньуутун аһыллыыта мустубут дьону үөртэ, биир санааҕа түмтэ. Таатта алгыстаах сирэ-уота кыттааччыларга  кыайыыга дьулууру, саҥа рекордары олохтуулларыгар күүс, тирэх буоллун!