Таалай күөлгэ сиэргэ баппат быһыы!

Дьокуускайга вандаллар уопсастыбаннай туоналары урусхаллыыллара тохтообот. Ааспыт нэдиэлэҕэ Таалай күөлгэ турбут ыскаамыйаны кимнээҕэ биллибэт дьон туура тардан ылан ууга бырахпыттар.

«Пааркалар уонна уопсастыбаннай туоналар дириэксийэтэ» муниципальнай автономнай тэрилтэ үлэһиттэрэ ыскаамыйаны ууттан таһааран, өрөмүөннээн, миэстэтигэр туруордулар. Полицияҕа сайабылыанньа суруллубут. 

Куорат баһылыга Евгений Григорьев социальнай ситимҥэ: «Ытыктабыллаах куорат олохтоохторо, өскөтүн эһиги бу быһылааны түбэһэн көрбүт буоллаххытына, ВКонтакте мин страницабар суруйаргытыгар көрдөһөбүн. Вандализм уопсастыбаннай үпкэ-малга улахан хоромньуну таһаарар. Үксүн уулусса банаардара, ыскаамыйалар уонна оптуобус тохтобуллара эмсэҕэлииллэр. Алдьаммыт малы өрөмүөннүүргэ уонна уларытарга куорат бүддьүөтүттэн үп-харчы барар. Маннык түбэлтэлэри бииргэ тохтотуохха!» – диэн ыҥырыы таһаарда.

Хаартыска: Евгений Григорьев телеграм-ханаалыттан