Таалай күөл кытылыгар дьон астына сынньанна

Ааспыт субуотаҕа, бэс ыйын 7 күнүгэр, Таалай күөл кытылыгар баар “Обнаженные сердца” эргин “Талое Фест” бэртээхэй тэрээһин буолан ааста.  Бэстибээл быйыл “Куорат тупсаҕай эйгэтин оҥоруу” тосхолунан тупсарыы ыытыллыахтаах эбийиэктэрин талар куоластааһыҥҥа киирбит “Обнаженные сердца” сквери өйүүр, ону тэҥэ дьон бу куоластааһыҥҥа кыттыытын көҕүлүүр соруктаах ыытылынна.

Санатар буоллахха, быйылгы куоластааһыҥҥа Дьокуускай куорат 8 туоната киирэн турар, нэһилиэнньэ онно көхтөөхтүк кытыннаҕына, элбэх куолаһы ылбыт 3 эбийиэккэ тупсарыы үлэтэ барыахтаах.

Тэрээһин кэмигэр волонтердар кэлбит дьону сөбүлээбит эбийиэктэригэр куоластыылларын көҕүлээтилэр.

Бу сайыҥҥылыы чэмэлкэй күннээх сылаас күн куорат олохтоохторун уонна ыалдьыттарын муспут тэрээһиҥҥэ маастардар уонна бэйэ дьарыктаах, тус бреннээх дьон улахан дьаарбаҥкалара ыытылынна. Маны сэргэ маастардар араас сыттаах чүмэчини оҥорууга, гипсэ оҥоһугу дьэрэкээн гына кырааскалааһыҥҥа уо.д.а. ыыппыт маастар-кылаастарыгар дьон үөрэ-көтө, сонургуу кытынна.  

Оҕолор “Обнаженные сердца” сквер оонньуур былаһааккатын толордулар, астына-дуоһуйа оонньоотулар. Маны сэргэ Таалай күөл кытылын кыйа араас атыы-кутуу тэрилиннэ. Араас сэргэх бириистээх күүһү холоһор күөн күрэстэр ыытылланнар, дьон көҕүн өссө үрдэттилэр. Сайыҥҥы дьаарбаҥкаҕа кэлбит сорох дьон Таалай эбэ устун тыынан, катамаранынан дуоһуйа хатааһылаатылар.

Бу өрөбүл күннээҕи куорат биир сэргэх тэрээһиниттэн хаартыскалары таһаарабыт.