Таалай күөл кытыла уонна Юрий Гагарин аатынан сквер быйыл үлэҕэ киириэхтээхтэр

Ол курдук, былырыыҥҥы куоластааһыҥҥа Юрий Гагарин аатынан сквер уонна Таалай күөл кытылыгар «Обнаженные сердца» былаһаакка кыайбыттара. Бу күннэргэ манна тутуу күргүөмнээхтик ыытыллар.

Гагарин уокуругар Можайскай уулуссатыгар баар Юрий Гагарин аатынан сквер 38-с, 24-с №№-дээх оскуолалар, «Незабудка» оҕо саада, Ю.А. Гагарин аатынан Култуура уонна аныгы искусство киинин уонна «Оригинал» маҕаһыын чугастарынан баар. Уулусса нөҥүө өссө биир бэлиэ уопсастыбаннай туона – «Ворота Якутска» турар. Сквер Дьокуускай аэропордуттан 500 м тэйиччи.

Бырайыак быһыытынан манна сынньалаҥ, оҕо оонньуур былаһааккалардаах, быыстапкалыыр сирдэрдээх буолуо, арт-эбийиэктэр, хачыаллар, аллея, тэрээһиннэри ыытар сирдэр оҥоһуллуохтара. «Аляска-Сибирь» дьоруойдарыгар аналлаах стела, дьоруойдар ааттарын үйэтитэр мемориал уонна Ю.А. Гагарин бюһа саҥардыллыахтара.

Санатан эттэххэ, 1986 с. манна Ю.А. Гагариҥҥа аналлаах бюст туруоруллуоҕуттан сквер бастакы космонавт аатын сүгэр. Кэлин 1942-1945 сс. «Аляска-Сибиир» трасса кыттыылаахтара үйэтитиллибиттэрэ, Бэлл П-39 «Аэрокобра» сөмөлүөт куоппуйата туруоруллубута.

Иккис бырайыак – норуокка биллэринэн «Обнаженные сердца» диэн Водянова скверэ. Саҥа эбийиэк аатын талыыга атырдьах ыйын 1 күнүгэр диэри нэһилиэнньэттэн этиилэри хомуйбуттара. Тулаһа Таалай күөл кытылыгар баар. Тутуулара саҥардыыны эбэтэр тосту уларыта тутууну эрэйэннэр, куоластааһыҥҥа киирбитэ. Бырайыак чэрчитинэн көхтөөх сынньалаҥы көҕүлүүр, куттал суох буолуутун хааччыйар, оҕо дьону үөрдэр саҥа оонньуур комплекс оҥоһуллуохтаах. Бу туонаны тупсарыы кини ураты тыынын, кэрэхсэбиллээх көстүүтүн биллэ сэргэхситиэ.

Санатар буоллахха, быйыл Дьокуускай куорат 45 400 куолаһы биэрбитэ (2025 сылга – 34 тыһыынча куолас). Манан сибээстээн куорат салалтата Дьокуускай куоракка тутуллар эбийиэктэри үбүлээһин кээмэйин үрдэтэргэ өрөспүүбүлүкэ бырабыыталыстыбатын кытта үлэни ыытар соругу туруоруммута.