Таҥха таайтарыылаах кэмэ – Арчы дьиэтигэр

«Таҥха Хааҥҥа сүгүрүйүү» сиэрин-туомун Ытык алгысчыт Афанасий Федоров иилээн-саҕалаан ыытта. Ыраастанныбыт, арчыланныбыт. Саҥа үүммүт сылы уруйдаатыбыт-айхаллаатыбыт, арыылаах алаадьыны амсайдыбыт.

Эдэр-эмэн дьон Таҥха оонньууларын оройуттан туттулар, үлэ, үөрэх кэнниттэн аралдьыйан ыллылар.

Бу күн айылҕаттан айдарыылаахтарга уһун уочарат олохтонно. Сылдьа үөрүйэхтэр бэлиэр үс чаастан кэлбиттэр.

Киэһэ 18.00 чаастан «Сээркээн сэһэн сэттиэлэтэ» сэһэнньиттэр, олоҥхоһуттар түһүлгэлэрэ саҕаланна. Бүгүн мустубут дьон алгысчыт, худуоһунньук, уйулҕаһыт Александр Григорьев-Саалтааны кэрэхсэбиллээх кэпсээнин сэргии иһиттилэр.

Санатан эттэххэ, тохсунньу 18 күнүгэр диэри, бу нэдиэлэ устата Арчы дьиэтигэр киэһэ аайы сэһэнньиттэр, олоҥхоһуттар ыалдьыттыахтара.