Түөрт кулууп РФ Култуура Министиэристибэтин өйөбүлүн ылла

Арассыыйа култууратын министиэристибэтэ ыыппыт Бүтүн Арассыыйатааҕы күрэхтэһиитигэр өрөспүүбүлүкэбит түөрт култууратын киинэ кыайыылаах тахсаннар, уопсайа 12 мөлүйүөн солкуобай сууманы өйөбүл быһыытынан ыллылар.

Кыайыылаахтар истэригэр – Өрөспүүбүлүкэтээҕи норуот айымньытын уонна социальнай-култуурунай технологияларын дьиэтэ, Чурапчы улууһун Кытаанах нэһилиэгин “Түһүлгэ” норуот айымньытын дьиэтэ, Уус Алдан оройуонун А.П. Петров аатынан Бэйдиҥэтээҕи норуот айымньытын киинэ уонна Дьокуускай куорат Хатас нэһилиэгин “Тускул” култуура киинэ.

СӨ култуураҕа министиэристибэтэ иһитиннэрбитинэн, Арассыыйа бэрэсидьиэнин көҕүлээһининэн ыытыллыбыт «Дьиэ кэргэн» национальнай бырайыагар киирэр «Дьиэ кэргэн сыаннастара уонна култуурунай инфраструктура» федеральнай бырайыак чэрчитинэн саҥа тэрээһиннэр 2026 сылтан олоххо киириэхтэрэ.

Өрөспүүбүлүкэтээҕи норуот айымньытын дьиэтин генеральнай дириэктэрэ Сергей Семенов бу үп-харчы сааланы саҥардыыга барыаҕын, ол тэрээһиннэр хаачыстыбаларын тупсарыаҕын, дьиэ кэргэн сыаннастарын бөҕөргөтүөҕүн бэлиэтээтэ.

Маны таһынан, Нөөрүктээйи нэһилиэгин “Айылгы” норуот айымньытын киинэ уонна Дьокуускайдааҕы 6 №-дээх “Сылаас дьиэ” библиотека-филиал сүүмэрдээһин түмүгэр Оҕо култуурунай-сырдатар кииннэрин тэрийиигэ кыайыылаах тахсаннар, 7,6 мөлүйүөн солкуобай субсидия ыллылар.