Төрүт тылы сайыннарыыга сыыппара көмөлөһөр

Төрүт олохтоох норуоттар тылларын сайыннарыыга туһуланар судаарыстыбаннай бырагырааманан өрөспүүбүлүкэҕэ 50 араас бырайыак үлэлиир. Олор истэригэр – үүнэр көлүөнэ ийэ тылын билэ улаатарыгар аналлаах ИТ-бырайыактар. 

Мантан түөрт бырайыак куонкурус түмүгүнэн өрөспүүбүлүкэ бүддьүөтүттэн үбүлэнэр. Ол курдук, Google Play киирбит «Алаас: Холодные земли» оонньуу тыһыынчаттан тахсата хачайдаммыт. Оонньуу Саха сирин 18-19 үйэлэригэр тиэрдэр. 10-12 саастаах сүрүн дьоруой уолчааны эбэлээх эһэтэ олох-дьаһах мындырдарыгар, үлэҕэ үөрэтэллэр.

«Мас-рестлинг» диэн головоломка ньыматынан оҥоһуллубут оонньуу көмөтүнэн нууччалыы уонна сахалыы тыллары толкуйдуохха сөп. Өссө биир «Сахалыы тыллар» диэн өйү сынньар оонньуу сканворд ньыматынан айыллыбыт.

Тыл саппааһын байытар сыһыарыы интерактивнай уруоктартан, тургутуктартан турар. Судаарыстыбаннай бырагыраама чэрчитинэн voice.nlrs.ru платформа анала –
оҥоһуу өйү саха тылыгар үөрэтии. 

Санатар буоллахха, Ил Дархан Айсен Николаев Ил Түмэҥҥэ Анал этиитигэр төрөөбүт тыл туттуллар эйгэтин кэҥэтэргэ сорук туруорбута. «Маныаха тыл үөрэхтээхтэрин, тыйаатыр, киинэ эйгэтин үлэһиттэрин, быһата, креативнай индустрия бары салааларын кытта ситимнээх үлэ наада», – диэн турар. Ол туһунан Ил Дархан уонна Бырабыыталыстыба пресс-сулууспата иһитиннэрэр.