"Төрөөбүт тыл уонна литература бастыҥ учуутала-2025" куонкуруһу үөрүүлээхтик арыйдылар

Бэҕэһээ "Төрөөбүт тыл уонна литература бастыҥ учуутала-2025"  Бүтүн Арассыыйатааҕы куонкурус регионнааҕы түһүмэҕин үөрүүлээх аһыллыыта буолла. Быйылгы 4-с төгүлүн ыытыллар куонкурус өрөспүүбүлүкэтээҕи түһүмэҕэр уопсайа 17 учуутал күрэхтэһиэ. Кыттааччылартан иккитэ эбэҥки тылын уонна литературатын учууталлара. 
Куонкурус кыттааччыларын СӨ үөрэххэ уонна билимҥэ миниистирин солбуйааччыта Степан Степанов эҕэрдэ тылынан көрүстэ. Өрөспүүбүлүкэ судаарыстыбаннай официальнай тыллары харыстааһыҥҥа уонна сайыннарыыга судаарыстыбаннай бырагырааматын чэрчитинэн Саха сирин оскуолаларыгар төрөөбүт тылы үөрэтиигэ ураты болҕомто уурулларын бэлиэтээн эттэ. Бу сылга төрөөбүт тыл уонна литература учууталларын сийиэһэ ыытыллыахтааҕын иһитиннэрдэ.
С.Н. Донской-II аатынан үөрэҕи сайыннарыыга уонна идэни үрдэтиигэ институт дириэктэрэ Ньургун Павлов төрөөбүт тылы үөрэтиигэ учуутал дьоһун суолталааҕын, сыллата куонкуруска кыттааччы учуутал ахсаана хаҥыырын бэлиэтээтэ.
"Төрөөбүт тыл уонна литература бастыҥ учуутала-2025" идэтийии маастарыстыбатын куонкуруһа 3 күн устата ыытыллар. Кыттааччылар "Уруок", "Методика мастарыскыайа", "Кылаас чааһа" уонна "Маастар кылаас" түһүмэхтэринэн күрэхтэһэллэр. 
Бу куонкуруска Дьокуускай куораттан  Айыы кыһатын саха тылын уонна литературатын учуутала Рустам Каженкин кыттар.

 Хаартыска: "Вести саха" телеграм-каналтан