Төрөөбүт дойду өҥ буора...

Ол курдук, кырыктаах кыргыһыылар буолан ааспыт хонууларыттан тыһыынчанан ахсааннаах, Ийэ дойдуларын көмүскүү сылдьан охтубут буойун ытык уҥуоҕугар төрөөбүт дойдутун өҥ буорун сыта кутун-сүрүн уоскутар, кэнчээри ыччатын, дойдутун дьонун махталларын тириэрдэр.

Антонина Петровна Ефремова, саха норуодунай суруйааччыта Е.П. Неймохов аатынан Литератураны уонна кыраайы үөрэтэр түмэл үлэһитэ:

– 2020 сыллаахха, Е.П. Неймохов төрөөбүтэ 70 сылыгар, «Саха норуодунай суруйааччыта Егор Неймохов Санкт-Петербурга уопсастыбаннай үлэтин суолунан» диэн бырайыак чэрчитинэн Мэҥэ Алдантан дэлэгээссийэ баран кэлбиппит.

Биир дойдулаахпыт көмүс уҥуоҕа баар сиригэр төрөөбүт буорун илдьэн уурарга Василий Николаевич Бурнашев көрдөспүтэ. Кини кэргэнин абаҕата Сыромятников Дмитрий Иванович Ленинградскай уобаласка Синявино диэн к.т.б.  аттыгар көмүллүбүтүн туһунан 1942 сыллаахха сурук кэлбит. Онтон ордук тугу да билбэт эбиттэр. Кини 695 стрелковай батальоҥҥа разведчигинэн сулууспалаабыт. Хорсун, бэйэтин кыанар буолан табаарыстарын ытыктабылын ылбыт. Үстэ улахан кыргыһыыларга кыттыбыт. Онтон 1942 с. кулун тутар 11 күнүгэр кыргыһыы хонуутугар өлбүт.

Онон биһиги Санкт-Петербургтааҕы Саха сирин Бастайааннай бэрэстэбиитэлистибэтин кытта билсэн Синявино куорат таһыгар Синявские высоты диэн сиргэ Братскай көмүллүү баарын билбиппит. Онно тиийэн балай да көрдөөн булан ылан, төрөөбүт дойдутун буорун, сибэкки ууран сүгүрүйэн кэлбиппит.

83 сыл ааспытын кэннэ тапталлаах Мэҥэ Алданын буора киниэхэ тиийбитэ...
Ким да умнуллубат, туох да умнуллубат!