Төннөрүллүбэт билиэккэ да харчыны төннөрүөххэ сөп

Былааннаммыт айан тиһэх мүнүүтэҕэ тохтоон хаалар түгэннэрэ баар буолар. Маннык түгэҥҥэ дьон үксэ билиэт харчытын төнүннэрэ сатаабат. Ол гынан баран, юрист Ольга Александрова этэринэн, билиэт төннөрүллүбэт да буоллаҕына, ороскуоттаммыт харчыны төнүннэриэххэ сөп.

«Билиэт харчытын төннөрөргө маннык биричиинэлэр төрүөт буолаллар: эйигин кытта көтүөхтээх чугас киһиҥ өлбүт эбэтэр ыараханнык ыалдьыбыт буоллаҕына. Бэйэҥ ыараханнык ыалдьар түгэҥҥэр эмиэ харчыгын төнүннэрэр бырааптааххын», — диэн быһаарда юрист.

Ол гынан баран харчыны төнүннэрэр өссө биир улахан ирдэбил баар. Көтөр рейс регистрацията бүтүөр диэри тиэйээччигэ аккаастыырыҥ туһунан хайаан да сэрэтэр эбээһинэстээххин. Регистрация бириэмэтин билиэккэр көрүөххүн сөп. Маны таһынан, бэйэҥ эбэтэр аймаҕыҥ ыалдьыбыт эбэтэр өлбүт түгэнигэр, аккаас убаастанар биричиинэтин бигэргэтэргэ ирдэнэр докумуоннары (медицинскэй ыспыраапка, өлбүтүн туһунан туоһу сурук) тиэйээччигэ биэриэхтээххин.