Түүн аайы оҕо ытыырын истэрэ..

Бастаан үөрүүбүт муҥура суох этэ: сүүрэн таҕыстыбыт да, маҕаһыын, оптуобус тохтобула, тыйаатыр. Аны кыбартыырабыт толору хааччыллыылаах, түннүгүнэн – кэрэ көстүү. Ол эрээри дьолбут уһаабатаҕа...

Сотору ийэбит түүн аайы баттатар, утуйбат буолан хаалбыта. Арай түһээтэҕинэ, кып-кыра кыыс оҕо кэлэн, кинини ханна эрэ сиэтэн илдьэр үһү. Онно тиийдэхтэринэ, уйа-хайа суох ытаан тоҕо барар эбит. Ийэм араастаан уоскута сатыыр, ол аайы кыыс өрө бара-бара ытыыр, онтон олох даҕаны айаҕыттан хаан тахсар үһү. Ол сытан, ийэм уһуктан кэлэрэ.

Түүн аайы баттатар буолан, утуйбакка улаханнык эрэйдэммитэ. Киэһэ буолла да, хараҕын симиэн да куттанар быһыылааҕа.

Сотору соҕус, кыс-хаар ортото куорат кытыытыгар көспүппүт. Оччолорго орой-мэник оҕолор төрөппүттэрбититтэн толору хааччыллыылаах кыбартыыраттан тоҕо уута-хаара суох чааһынай дьиэҕэ барбыппытын ыйыталаһа сатаабатахпыт. Хата, туспа тиэргэннээх буолан, биһиги үөрүү-көтүү, таһырдьаттан киирбэт этибит.

Кэлин, арыый улааппыппыт кэннэ, ийэбит кэпсээбитэ. Биирдэ үлэтиттэн дьиэлээн иһэн оптуобус тохтобулуттан биһиги анныбытынааҕы кыбартыыраҕа олорбут эмээхсини кытары аргыстаһан кэлбит. Кэпсэтиилэрэ оптуобус сырыытыттан саҕаланан баран, аан дойду политикатыгар кытта тиийбит. Ол иһэн, ийэм урут биһиги кыбартыырабытыгар кимнээх олорбуттарын сэмээр ыйыталаспыт. Онуоха эмээхсин сирэйэ-хараҕа уларыйан, куолаһа кыччаан хаалбыт. Итиэннэ айдааннаах соҕус ыал олорбутун кэпсээбит. Эр киһи арыгылаата да, дьахтарын кырбыыр, субу-субу милииссийэни ыҥыраллар эбит. Онтон субу төрөөрү сылдьыбыт хат ойоҕун үлтү кырбаан, дьахтар оҕото куоппутун, бэйэтин нэһиилэ быыһаабыттарын кэпсээбит. “Баҕар, ол төрөөбөтөх оҕо түүлгэр көстөрө буолуо... Эһиги көһөргүт ордук”, – диэн сибигинэйэн кэриэтэ сүбэлээбит.