Түмэлгэ — быыстапка

Саха сириттэн Аҕа дойду Улуу сэриитигэр 62 тыһыынча киһи ыҥырыллан барбыта. Кыргыһыыга 30 тыһыынча кэриҥэ буойун охтубута. Тыылга хоргуйууттан, аас-туор олохтон 70 тыһыынча кэриҥэ киһи тыына быстыбыта. Сэрии сылларыгар Саха сирэ хас төрдүс олохтооҕун сүтэрбитэ.
Дьокуускай куоракка Ем. Ярославскай аатынан саха түмэлэ Кыайыы 80 сыллаах үбүлүөйүгэр аналлаах сэрии сылларыттан история чахчыларын көрдөрөр, кэпсиир быыстапканан саҥа сылы саҕалаата.
Онон, күндү ааҕааччы, иллэҥсийбиччэ, Кыайыы үбүлүөйдээх сылыгар турбут бастакы быыстапка туһунан хаартысканан билсиэҕиҥ.

Өйдөбүнньүк уонна үйэтитии

Көҥүл, эйэлээх олохпутун көмүскээбит сэрии хонуутугар эдэркээн тыыннарын биэрбит уонна этэҥҥэ эргиллэн уйгулаах олох тупсарыгар кыттыбыт дьоммут ааттара үйэтийдин, дьон-сэргэ өйдүү көрө сырыттын диэн Ем. Ярославскай аатынан түмэлгэ «Только Победа» быыстапка тэрилиннэ.

Ким да умнуллубат, туох да умнуллубат

Быыстапка дьон-норуот өйдүү-саныы сырыттын, өйөбүл, көмөлөһүү баар буола турдун диэн сыаллаах. Манна дьиэ кэргэнинэн, чугас аймахтар, бииргэ сулууспалааччы дьон кыһамньылаахтык харайан кэлбит малларын туттардылар.

Сэрии дуораана

Быыстапка киин экспозициятыгар Аҕа дойду Улуу сэриитин кэминээҕи хаартыскалар уонна хаһыаттар, сэрии сэбэ-сэбэргилэ турбуттар.

Буорах сыттаах...

Сэрии кыттыылаахтарын байыаннай таҥастара.

Кэм-кэрдии кэрэһиттэрэ 

Өстөөхтөн былдьаммыт сэрии сэбэ, байыаннай мал.

Немец бэстилиэтэ, өстөөх мэтээллэрэ, уордьаннара.

Сэрии суола – Кыайыы суола

Саха сирин бэргэн ытааччылара тутта сылдьыбыт аатырбыт бинтиэпкэлэрэ, эрэллээх бэстилиэттэрэ, ону таһынан Шпаген пулемета.

Сэрии туоһулара

Кыргыһыы хонуутуттан булуллубут матырыйааллар: миинэ дьааһыктара, ботуруоннар, гильзалар, противогаз. Онно киирэр Аҕа дойду сэриитин кыттыылааҕа Новиков Сергей Сергеевич трофей  кинжала.

80 сыл ааспытын кэннэ...

«80 сыл ааспытын кэннэ...» диэн ураты эрээтинэн анал байыаннай дьайыы кыттыылаахтарын дьиҥнээх тэриллэрэ, таҥастара-саптара уонна сэрии сэбэ туруорулуннулар.

Хаартыскалар: Ааптар түһэриилэрэ