Төлөпүөҥҥүн умса уурума!

Үгүстэр экраммыт харыстыыр өстүөкүлэлээх (пленкалаах), чехолум  кытыыта да сөбүгэр тахса сылдьар диэн умса уурарбыт баар буолар. Ону баара, ончу оннук ууруо суохтаах эбиппит. Тоҕо?

Үгүс төлөпүөн экранын аннынан кэпсэтии иһиллэрин курдук көстөр-көстүбэт, чараас тимир сиэккэнэн быыһаммыт быыстаах буолар. Экрана аллара диэки буоларын курдук уурдахпытына ол быыһынан туох баар быыл, киһи хараҕар көстүбэт түү, бэл, бисиэнньэ, ас быычыкаа кыырпаҕа,  онно симиллэрин бэлиэтээбиттэр. Ону таһынан офиска, коворкиннарга эбэтэр автосиэрбискэ харахха көстүбэт тимир быыла баһаам буоларын, ону төлөпүөн динамига магнит курдук бэйэтигэр тардарын эппиттэр. Быыл, кир мунньулуннаҕына мембрананы быыкаа да быыс-хайаҕас көстүбэт гына бүөлээн кэбиһэр.

Ол бүөлэммит сиэккэни иннэнэн эбэтэр тиис ыраастыыр маһынан ыраастааччы буолан, букатын да динамигы буорту гыныахха сөп.

2. Экран үөһэ өттүгэр фронтальнай камера таһынан элбэх сенсордаах сырдыгы билэр датчик баар буолар. Холобур төлөпүөммүтүн кулгаахпытыгар чугаһаттахпытына экран хараҥарар, онтубут ол датчик көмөтүнэн ситиһиллэр. Төлөпүөнү экранынан уурдахха быычыкаа быыл, кумах кэбэҕэстик сыстар. Ол түмүгэр датчик таһынааҕы өстүөкүлэтэ кэбэҕэстик тунаарар. Оччотугар, холобур, туох эрэ олус суолталааҕы кэпсэтэ туран, алҕас иэдэскитинэн экраны таарыйан, кэпсэтиини арааран кэбиһэргит, кэбиһэргит элбээн барар. Тоҕо диэтэххэ, датчик тунаарбыт өстүөкүлэ нөҥүө толоруохтаах “дуоһунаһын” сатаан толорбот буолан, кулгаахха чугаһаппыккын өйдөөмүнэ, экранын хараардыбат, ол кэмҥэ алҕас таарыйдыҥ да арахсыан сөп.

3.Үгэс курдук, бары да туох хайа иннинэ тутаах – экран кэлин өттүнээҕи камераны харахпыт харатыныы харыстыыбыт. Ону баара фронтальнай, ол аата экраҥҥа баар камера ураты харыстабыллаах сыһыаны эрэйэр үһү. Исписэлиистэр бэлиэтээбиттэринэн, “фронталка” оптикатын схемата олус “уйан” буолар. Наар тугу эрэ кытта аалыстар буоллаҕына, объектив иннэ сарааппыналанар. Оннук түгэҥҥэ сиэлпи тунаархай, онон-манан бликтэрдээх уонна чуолкайа суохтук түһэрэр буолар.

Өссө ити камера көмөтүнэн өйдөөх тэрил сирэйгин “билэн” (Face ID),  бэйэтэ аһыллар (разблокировкаланар) кыахтаммытын билэҕит. Оттон умса уурулла сылдьан болоорхой өстүөкүлэлэммит камералаах сирэйгин сатаан көрүмүнэ,  ити ньыма хаачыстыбата мөлтүүр, үлэлиир-үлэлээбэт буолуон, төлөпүөнүҥ пароль көрдөөн эрэйдиэн сөп.

4.Төһө да эн сыаналаах, көмүскүүр кытыылаах чехоллан, оллурдаах-боллурдаах ньуурга, холобур, кытаанах матырыйааллаах дьыбаан сабыытыгар, былаастык паапка үрдүгэр эҥин, ууран баран, алҕас баттаатаххына, онтуҥ сорох сиринэн өстүөкүлэҕин холкутук таарыйыа. Түмүгэр OLED уона AMOLED курдук  экраннарга хайдах да сот барбат күөх, оруоһабай полоскалар үөскүөхтэрин, устунан тачскрин букатын үлэлээбэт буолуон сөп.

Төлөпүөнүҥ хаппырыыстыыра элбээтэҕинэ, экраныҥ кэпсэтии кэмигэр хараарбат, кэпсэтэр киһиҥ саҥата мөлтөхтүк иһиллэр эбэтэр сиэлпиҥ чуолкайа суох буоллаҕына экраҥҥын төһө да сот, аал, үөскээбит кыһалҕаны быһаарарыҥ саарбах. Тоҕо диэтэххэ, экраны аллара өттүнэн наар уураргыттан, быыллаах сиргэ илдьэ сылдьаргыттан датчига мөлтөөбүт, динамига киртийбит буолуон сөп. Ону исписэлиистэр эрэ быһаарар, ыраастыыр, уларытар кыахтаахтар. Онтуҥ босхо буолбата чуолкай.

“Онон эрдэттэн төлөпүөнү экранынан умса уурбат гына үөрүйэхтэммит быдан ордук”, – диэбиттэр.