Түөкүттэр оҕолору албыннаатылар

Полиция салаатыгар олохтоох киһи үҥсүбүт: суоҕар кимнээх эрэ сиэйпэлэри арыйбыттар уонна дьиэни чүүччэйбиттэр. Оперативниктар тута сэрэйбиттэр: бу көннөрү уоруйахтар буолбатахтар, кибер-түөкүттэр сиэртибэлэрэ быһыылаах диэн.

Бэрэбиэркэ кэмигэр биллибитинэн, түөкүттэр төлөпүөнүнэн сибээскэ тахсан хаһаайыннар 17 саастаах кыыстарын куттаабыттар — кыыс кыбартыыра күлүүһүн болдьоспут сирдэригэр кистээбит. Ол кэнниттэн ити курдук ньыманан 18 саастаах уолу кыттыһыннарбыттар. Уол сымыйа быраабы харыстыыр үлэһит сорудаҕынан дьиэҕэ киирэн, сиэйпэлэри арыйан баран хостору чүүччэйбит.

Тутуллубут уол полицияҕа быһаарбытынан, кини анал сулууспалар штаты таһынан үлэһиттэрин быһыытынан оперативнай тэрээһиннэргэ кытта сылдьарын итэҕэйбит эбит. Кинини маныаха сокуону кэһэн туран атын дьон дьиэтигэр киирэргэ бирикээстээбиттэрэ да тохтоппотох. Хата, сиэйпэлэргэ сыаналаах маллар суох буолан биэрбиттэр, онон бас билээччилэр улахан ночооту ылбатахтар.