Түөкүн элбэҕэр маны билэриҥ туһалыа

Аныгы үйэ дьоно үгүс боппуруоһу Судаарыстыбаннай өҥө (Госуслуга) порталын, сыһыарыытын нөҥүө быһаартарар, дьыалабытын-куолубутун толотторор, ситиһэр буоллубут. Ол да буоллар билбэппит-көрбөппүт үгүс. Түөкүттэр ону туттумахтаһан, албыҥҥа-көлдьүҥҥэ үктэтэллэрэ – баар суол.

Холобур, Госуслуга аатыттан СМС ыытыахтарын сөп. Оттон ол дьиҥ официальнай порталтан дуу, түөкүттэртэн кэлбитин дуу хайдах быһаарабыт?

*Бастатан туран, дьиҥнээх Госуслуга иһитиннэриитэ (сообщение) кылгас 0919 эбэтэр буукуба-сыыппара суруктаах ID gosuslugi диэнтэн эрэ кэлэр.

*Официальнай сулууспа хаһан даҕаны Арассыыйаҕа бобуулаах Meta* хампаанньа ватсабынан (WhatsApp*), телеграмынан уонна да атын мессенджеринэн тугу да ыыппат.

*«Техподдержкаҕа эрий» диэн ааттаан сымыйа нүөмэри ыытыахтарын сөп. Өйдөө: Госуслуга официальнай нүөмэрэ икки эрэ: 8 (800) 100-70-10 уонна 115. Итинтэн атын буолла да, түөкүттэр ыыппыттара чуолкай.

*«Госуслугаттан» ыыттыбыт диэн ааттаан порталга киирэргэр эбэтэр дааннайы бигэргэтэргэр манна киир диэн, буортулаах сигэлэри (ссылкалары) ыытыахтарын сөп. Ону хаһан да туһаммат буолуҥ. Тоҕо диэтэххэ, официальнай портал хаһан да итинник ыыппат.  «Аккауҥҥун алдьаппыттар» (взлом), «тоҕо эрэ эмискэ активнайдаан турбуттар» диэх курдук ыксатар-тиэтэтэр буоллулар да, төлөпүөҥҥүн араар.

*Судаарыстыбаннай сулууспалар официальнай иһитиннэриилэрэ хаһан да алҕастаах, сыыһалаах буолбат. Кичэйэн бэрэбиэркэлээн ыыталлар. Онон СМС-нан кэлбит иһитиннэриини болҕойон көр. Орфографическай эбэтэр сурук бэлиэтигэр сыыһалаах буолла да – түөкүн буулаабыт. Суруллубут сигэни баттаама, ыйыллыбыт нүөмэргэ да, ыыппыт нүөмэргэ да эрийимэ. Ыыппыт нүөмэри блоктаан кэбис.

Холобур, gosuslugi.ru диэн оннугар gos-yslugi.ru диэн ыыталлар эбит. Ыксыы олорор эбэтэр мөлтөх харахтаах киһи ону болҕойбокко хаалыан сөп.

*Ол кэнниттэн ханнык нүөмэртэн итинник сэрэхэдитэр сигэ кэлбитин Госуслуга саайтыгар баар «Обратная связь» баһыгар, итии лииньийэ 8 (800) 100-70-10 нүөмэригэр биллэр. Оттон бэлиэр угаайыга киирбит түгэҥҥэр, тута полицияҕа эрий.