Үтүө холобур буолуохтун!

Аһыыр аспытын кыайан хааччыммакка, ууга хаайтаран, тиэхиньикэ да туораабат, сылдьыбат уустук балаһыанньата үөскээтэ.

Онуоха көмөҕө оскуола оҕолоро кэлэн аспытын-үөлбүтүн, килиэппитин, малбытын ууну тэпсэ сылдьан туоратан,  бары да сүргэбит көтөҕүлүннэ, санаабыт көнньүөрдэ. 

Оҕолорбут барахсаттар туох да харса суох бэйэлэрин баҕаларынан биһиэхэ көмөлөспүттэригэр барҕа махталбытын тиэрдэбит. Биһиги дэриэбинэҕэ үксэ саастаах дьон олоробут. Онон ууга киирэр да киһи суох. Аны өрүс уута, төһө да самаан сайын сатыылаан турдар,  тымныы буолар. Ону ол диэбэккэ оҕолорбут барахсаттар иннилэринэн буолан бэрт хорсуннук, харса суох биһиэхэ көмөлөспүттэриттэн олус улаханнык үөрдүбүт, астынныбыт. Аны туораппыт малларын,  астарын барытын ыалларынан түҥэтэлээн биэрдилэр. Кинилэр кимнээх диир буоллахха, Вася Неустроев  (Таатта орто оскуолата, 10-с кылаас), Симон Заровняев (Тумул орто оскуолата, 10-с кылаас), Никифор Заровняев (Тумул орто оскуолата, 11-с кылаас). 

Васяҕа, Симоҥҥа, Никифорга туйгун доруобуйаны, үөрэхтэригэр ситиһиини, инникитин да дойдуларыгар, норуоттарыгар туһалаах буола улааттыннар, этэҥҥэ сырыттыннар диэн туран, дьон кыһалҕатын өйдүүр, дьоҥҥо көмөлөһөр гына ииппиттэригэр төрөппүттэригэр эмиэ истиҥ махтал тылларын аныыбыт.

Уус Алдан улууһун Арыы-Тиит олохтоохторо