Үтүө бачыым түмүгэ

Оччотооҕу оҕолор күн бүгүнүгэр диэри тутуспутунан биир интэриэһинэн сылдьан, ыал эбээлэрэ, эһээлэрэ буолбуттар. Эдэр сылдьан хаһан эрэ «Коммуна тэриниэххэйиҥ» диэн күлэ-оонньуу этиллибит биир тыл ыра санаа буолан, атын кылаас оҕолорун кытта холбоһон, дьону түмэн, сомоҕолоһуу күүһүнэн тутуллубут  балаҕан дьиэлэригэр 2026 сылы көрүстүлэр.
Бу биир үтүө бачыым хайдах, туохтан саҕаламмытын билсистибит.
Наталья Васильевна Кузьмина, Үөһээ Бүлүү оскуолатын 1981 сылга бүтэрээччилэр лидердэрэ:
– Оскуоланы бүтэрбиппит 45 сылыгар бэлэх оҥоһуннубут. Бу баҕа санаабыт олоххо киирэригэр 2019 сылга Уһук Илиҥҥи гектарынан бастаан сир ылбыппыт. Былырыын дэлээнэ быстаран, мас охторон, пилорамалатан, от ыйыттан балаҕаммыт тутуутун ылсыбыппыт.
Тутууга сүрүн күүс олохтоох уолаттарбыт буолаллар,бэйэлэрэ тиэхиньикэлээх, пилорамалаах буоланнар кыайдыбыт. Онтон үбүлээһиҥҥэ 1981 сыллааҕы Үөһээ Бүлүүттэн төрүттээх өрөспүүбүлүкэ араас улуустарыгар олорор үөлээннээхтэрбит күүс-көмө буоллулар. 2026 сылы бары балаҕаммытыгар мустаммыт көрсүбүппүт олус үөрүүлээх.
Түгэнинэн туһанан бука бары үтүө дьыалаҕа кыттыспыт дьоммутугар махталбытын тириэрдэбит.