Сыыппаралар, чахчылар

Өрөспүүбүлүкэ бырабыыталыстыбатын 2025 сыллааҕы үлэтин отчуотун кэмигэр этиллибит оҕоҕо, ыччакка сыһыаннаах кэккэ сыыппаралар:

Күн бүгүн өрөспүүбүлүкэҕэ 37 тыһ. элбэх оҕолоох ыал олорор. 2025 сылга 3 тыһ. кэриҥэ ыалга өрөспүүбүлүкэтээҕи Ийэ хапытаала анаммыт. Былырыыҥҥыттан саҕалаан итинник өйөбүл хапытаал үһүс, төрдүс уонна ол кэннинээҕи оҕоҕо бэриллэр буолбут.

Тус сыалаах «Дети столетия» өйөбүл былырыын 13 тыһ. ыалга анамыт. Бастакытын холбоһор, 35 –тэригэр диэри саастаах 800 эдэр ыал 50 тыһ. солк. өйөбүлү ылбыт.

Бэс ыйын 17 күнүнээҕи туругунан, Саха сиригэр быйыл  4 451 кырачаан күн сирин көрбүт. Бу – былырыыҥҥы сыл туһааннаах кэмигэр тэҥнээтэххэ, 200-оҕонон аҕыйах.

Оҕолоох ыаллары өйүүргэ былырыын уопсайа 32 млрд 100 мөл. солк. туттуллубут.

Оттон быйыл элбэх оҕолоохторго көрүллэр өйөбүлгэ – 200 мөл. солк., тулаайах оҕолору босхо дьиэнэн хааччыйыыга  –  209 мөл. солкуобайынан аҕыйах үбүлээһин былааннаммыт.

Саха сирин эмтиир тэрилтэлэрэ бырааһынан – 76%, орто медперсоналынан  – 92% хааччыллан олороллор.

Күн бүгүн орто анал идэни биэрэр үөрэх кыһаларыгар 24,5  тыһ. устудьуон 215 көрүҥ идэҕэ үөрэнэ сылдьар.

 «Профессионалитет» федеральнай бырайыак куонкурусугар кыайыыны ситиһээччи ахсаанынан Саха сирэ инники күөҥҥэ сылдьар эрэгийиэннэргэ киирсэр. Ол түмүгүнэн, «информационнай технологиялар», «тутуу», «тырааныспар», «уматык-энергетика холбоһуга», «электротехника», «туризм» уонна «чэпчэки бырамыысыланнас» хайысхалаах 7 саҥа үөрэх кластерын тэрийиигэ 1 млрд солк. көрүллүө.

2025 сылга судаарыстыбаннай түмүктүүр аттестация түмүгүнэн Саха сирэ дойду үрдүнэн 21-с миэстэҕэ таҕыста. Ити аата,  икки сыл иһигэр 47 пуунунан тупсубута этилиннэ. Судаарыстыбаннай кэлим эксээмэннэр түмүктэрэ тупсан иһэр. Бүтүн Арассыыйатааҕы олимпиадаларга кыттыы кэнники 15 сылга бастыҥ түмүгү көрдөрдө.

Былырыын Саха сиригэр 4 оскуола, 2 уһуйаан, эбии үөрэхтээһин 3 эбийиэгэ тутуллан, үлэҕэ киирдэ.  Ити иһигэр Дьокуускайга – Бастакы Бэрэсидьиэн М.Е. Николаев аатынан 40-с нүөмэрдээх улахан оскуола уонна Адаптивнай үөрэх холбоһугун оскуолата.