Сыыппаралар, чахчылар

РФ дьон доруобуйатыгар сыһыаннаах национальнай бырайыактарын чэрчитинэн Саха сиригэр медицина салаатын элбэх саҥа тутуулара олоххо киирдилэр. Ол курдук, Баатаҕайга, Бүлүүгэ, Ытык Күөлгэ, Хонууга, Чурапчыга, Уус Майаҕа аныгы ирдэбилгэ эппиэттиир улахан балыыһалар тутуллан үлэлии тураллар. Дьокуускайга Онкодиспансер радиологическай куорпуһун саҥардан, тупсаран оҥордулар. Саха сирин киэн туттуута буолбут Кардиососудистай уонна Онкология кииннэрэ тутуллубуттарын билэҕит. «Уһун уонна көхтөөх олох» национальнай бырайыагынан Мэҥэ Хаҥалас киинэ Майаҕа  4 тыһ. кв. м иэннээх, 33 куойкалаах балыыһа тутуута бара турар.

Улуустарга 94 амбулатория уонна биэлсэр-акушер пууннара баар буоллулар. 50-тан тахса эбийиэккэ хапытаалынай өрөмүөн ыытылынна.

***

Быйыл Саха сирин 200 тыһ. тахса олохтооҕо диспансеризацияны ааста. Сыл бүтүөр диэри көрдөрүммүт ахсаана өссө эбиллиэ.

***

«Онкопоисксаха.рф» 2020 сылтан үлэлиир. Бу платформаҕа 28 330 киһи анкетаны толорбут. Анкетаҕа хоруйдаһыы түмүгүнэн гражданин онко-чинчийиини барыан наадата быһаарылыннаҕына, күн анаан, ыҥыраллар. Чопчута, тыҥаҕа, быарга, простатаҕа, айах иһигэр, суон уонна көнө оһоҕоско, дьахтар мааткатыгар, түөһүгэр тахсыан сөп искэннэри быһаарар скрининг, анаалыс ылаллар.

Көрдөрүнүү түмүгэр искэнинэн ыалдьыбытын билбэккэ сылдьыбыт 68 киһи булуллубут. Үгүс өттүгэр искэн саҥардыы үөскээн эрдэҕинэ быһаарыллыбытын бэлиэтиир тоҕоостоох. Төһөнөн эрдэ билэҕин, эмтэнии түмүгэ оччонон үчүгэй буолар.

Электроннай почта – oncopoicksakha@mail.ru

Билсэр төлөпүөн: +7 (411) 231-65-75

«Итии лииньийэ»:  +7 (914) 270-53-79