Сыыппара солкуобайы туһаныы саҕаламмыт

Үгүстэр ыраахтан, сурах хоту истэн да куттанар, сэрэхэдийэр сыыппара харчыбыт (цифровой рубль) мантан инньэ дьиҥ олоххо өр-өтөр буолбакка кимиэллээхтик киирэр, туһаныллар буолбут чинчилээх. Ол курдук, Саха сирин олохтоохторо уоту туһаныы иһин ыйдааҕы төлөбүрбүтүн ылар ДЭК хампаанньа итинник харчыны бу дьыл балаҕан ыйын 1 күнүттэн хайыы үйэ туһанар буолбут. Бу сонун төлөбүрү Арассыыйаҕа 2025 сыл от ыйын 23 күнүгэр тахсыбыт 248 нүөмэрдээх Федеральнай сокуоҥҥа олоҕуран олоххо киллэрбитин быһаарар.

Санатан эттэххэ,1 сыыппара солкуобай көннөрү, үгэс буолбут 1 солк. тэҥнэһэр. Уу харчыны уонна “безналы” кытта, этэргэ дылы, тэҥ баайыылаах, суолталаах буолар.

Биирдиилээн сирэйдэр сыыппара харчынан төлөһүүлэрэ хамыыһыйата суох Тус кэбиниэт нөҥүө оҥоһуллар үһү. “Син эмиэ “безналынан” курдук төлөһөҕүн, олоҕурбут үгэстэн туох уратыта суох”, – диэбиттэр.

Корпоративнай килийиэннэр эмиэ итинник төлөһүүлэрин сыыппара счетун реквизиттэригэр (реквизитам цифрового счета) ыытыахтаахтар.  Бу 2026 сыл ахсынньы 31күнүгэр диэри кинилэр эмиэ хамыыһыйата суох төлөһөллөрүн курдук, ЧЭПЧЭТИИЛЭЭХ КЭМ биллэриллибит. Итинтэн сылыктаатахха, кэлэр сылтан хамыыһыйа киирэр быһыылаах.

Үөһэ этиллибит Федеральнай сокуоҥҥа уотунан хааччыйыыттан атын өҥөнү оҥорооччуларга эмиэ сыыппара солкуобайынан ылар кыахтаахтара этиллэр. Онон, баҕар-баҕарыма, сатаа-сатаама, сыыйа-баайы да буоллар,  сонун национальнай валютаны бары да туһанар кэммит кэлбит.

Сокуон күүһүгэр киирбитэ 10 күн буола охсубут. Эһигиттэн ким эмэ бэлиэр сыыппара солкуобайынан төлөһөн көрдө дуу?