Сыыппара харчыны туһаныы, кэлим QR-код, баан каартатын көҥүллэнэр ахсаана уонна да атын туһунан

Дойду бөдөҥ бааннарын килийиэннэрэ сыыппара солкуобайы туһанар кыахтаммыттар. Ол курдук, килийиэн баҕарар, туруорсар түгэнигэр, бааннар сыыппара солкуобай счетун арыйар эбээһинэстэммиттэр. Килийиэн сыыппара харчыны атын киһиэхэ ыытыан, атыылаһар сээкэйин иһин төлөһүөн сөп. Ол эрээри биирдиилээн сирэйдэр сыыппара счетун хайаан да астыахтаатарын туһунан кэпсэтии турбат. Аһарыҥ-аспатыҥ, туттарыҥ-туттубатыҥ – бэйэҥ көҥүлүҥ. Атын уу харчы да, “безнал” да туттулларатохтообот. Сыыппара солкуобай итилэри сэргэ эбии төлөһөр ньыма быһыытынан киирэн биэрэр. Ол эбэтэр кими барытын хайаан да сыыппара солкуобай счетун арый диэн моһойор кыах бэриллибэт суох. Ол да буоллар, сокуон күүһүгэр киирбит, онон сыыйа-баайа да буоллар, сыыппара солкуобайы туһана үөрэнэр кэммит чугаһаабыт бадахтаах.

Дьэ оттон 120 мөл. солкуобайтан үгүөрү харчыны (выручка) киллэринэр улахан атыы-тутуу тэрилтэлэрэ уонна биир оччо үбү киллэринэрдээх өҥө оҥорор тэрилтэлэр сыыппара солкуобайынан хайаан да төлөһөр усулуобуйаны оҥорон, оннук счету булгуччу астыахтаахтар.

***

Аны, бу дьыл балаҕан ыйын 1 күнүттэн саҕалаан табаар, өҥө иһин төлөһүүгэ  төлөбүр каартатын Национальнай тиһигин кэлим (единый) QR-кода  диэн туттуллар буолбут. Ол код нөҥүө төлөбүр ньыматын талар буолабыт, ол иһигэр СБП эбэтэр сыыппара солкуобайы туһаныы эмиэ киирэр.

***

Ону тэҥэ криптовалютаҕа сыһыаннаах, криптовалютаны туһанары бэрээдэктиир сокуон эмиэ киирбит. Ол сокуон биржаларга, брокердарга, депозитарийдарга уонна криптовалютаны атастаһыыга саҥа быраабыланы киллэрбит. Биирдиилээн дьон криптовалюта атыылаһалларыгар анал тургуту (тестирование) ааһар буолбуттар. Квалификацията суох инвестордарга Киин баан посреднигы туһанар түгэннэригэр 300 тыһ. солк. хааччаҕы олохтообут.

Ол да буоллар күн бүгүн табаар, өҥө да иһин криптовалютанан төлөһүү биһиги дойдуга билигин да бобуллар.

***

Барыбытын таарыйар сонун баар. Бу дьыл балаҕан ыйыттан баан каартатын учуоттуур кэлим тиһик үлэлээн саҕалаабыт. Баан реестиргэ киирэн килийиэнэ хас каарталааҕын көрөр кыахтанар. Кэлэр 2027 сыл балаҕан ыйыттан биир киһиэхэ баан каартатын ахсаана муҥутуур элбээбитэ 20 буолара көҥүллэнэр буолуоҕа. Аата, элбэҕин, оччо каарталаах аҕыйах ини. Ол эрээри баар бөҕө буолан оннук сокуону ылынан эрдэхтэрэ.