Сытыы боппуруоспут  – каадыр

Холбоһук иннигэр турар соругу, былааны, кыһалҕаны быһаарсар тэрээһиҥҥэ бу хайысхаҕа илиилэрин араабакка үлэлии сылдьар култуура үлэһиттэрэ, преподавателлэр, муусуканы тарҕатааччылар, устудьуоннар – Таатта, Уус Алдан, Амма, Нам, Бүлүү, о.д.а. улуустартан барыта 55 киһи муһунна.

М.Н. Жирков аатынан музыка колледжын аактабай саалыгар ыытыллыбыт кэмпэриэнсийэ үлэтигэр култуура миниистирин солбуйааччыта Туйаара Турантаева кыттыыны ылла. Баянистар В.Г. Емельянов, Р.Н. Крылова, А.А. Потапов, А.И. Павлов, А.К. Калининскай  уо.д.а. туруорсубут боппуруостарын болҕомтолоохтук истэн, туһааннаах дьону кытта мунньах ыытыах буолбута кэмпириэнсийэ кыттыылаахтарын үөртэ.

Кэмпириэнсийэҕэ ордук сытыытык каадыр боппуруоһа таарылынна. Улуустарга үлэлии олорор музыкальнай оскуолалар хаарбах туруктаахтара, инструменынан хааччыллыы мөлтөҕө, баянистарга, аккордеонистарга анал куурустары сөргүтүү кыһалҕалара турда. Бу барыта ыччат ортотугар бу хайысхаҕа сайдыыны аҕалыыга туһуламмыт этиилэр. Маны таһынан биир кыһалҕа эмиэ этиллэн ааста. Ол курдук, М.Н. Жирков аатынан музыкальнай колледжка икки кэнники сылга баян кылааһыгар биир да устудьуон туттарсыбатаҕа мустубут дьону улаханнык соһутта. Ол эбэтэр оҕо олус кыра сааһыгар музыкальнай оскуоланы бүтэрэн баран, идэ талар кэмигэр атын хайысхаҕа халыйыыта бу турбут боппуруос эппиэтэ буолуон сөп курдуга толкуйга түһэрдэ.

Уус Алдан Бороҕоннооҕу оҕо искусствотын оскуолатын преподавателинэн үлэлиир Станислав Луковцев улуус баянистарын түмсүүтүн 2017 сылтан салайар, «Кэрэчээн дорҕооннор» бырайыак ааптара. Эдэр аккомпаниатордар 20 сыллаах үбүлүөйдээх куонкурустарын ыытарга көмөлөһүөхпүт диэн  Туйаара Турантаева  эппитин астына үллэһиннэ.

Бу бырайыак саамай кыра саастаах кыттааччытын туһунан интэриэһиргээбиппитигэр, Станислав Николаевич маннык кэпсээтэ:

– Сема Москвитин сааһа 9. Бэйэтэ ыллыырын баянынан доҕуһуоллуур. Бииргэ үөрэнэр үһүс, төрдүс кылаас оҕолоругар доҕуһуоллуур. Радомир Борисов аатынан ыытыллар куонкуруска “Учитель+Ученик” номинацияҕа оонньуохтаах. Бу оҕо Мүрү оскуолатыгар маҥнайгы кылааска киирэригэр тэҥинэн баян кылааһыгар киирбитэ. Билигин үһүс кылаас үөрэнээччитэ. Быйыл национальнай бырайыагынан кыра баян кэлэн, оонньууругар олус табыгастаах буолла.

Л.В. Собинов аатынан Саратовтааҕы судаарыстыбаннай  консерваторияҕа норуот инструменнарыгар оонньуур эдэр толороооччуларга ыытыллыбыт Н.В. Грибков аатынан Арассыыйа  иккис куонкурсугар Таатта оҕо искусствотын оскуолатын үөрэнээччитэ Леня Алексеев бастакы истиэпэннээх лауреат буолары ситиспитин туһунан «Киин куорат» суруйан турар. Уонна Леня ийэтэ хаһыакка анаан ыыппыт видеотын ааҕааччыларбытыгар аан бастакынан көрдөрөн турардаахпыт.

Бүгүн Леня Алексеев учууталын, Тааттатааҕы оҕо музыкальнай оскуолатыгар үлэлиир улуус баянистарын түмсүүтүн салайааччыта Александр Павловтыын көрүстүбүт. Уонна үөрэнээччитэ үрдүк ситиһиитинэн эҕэрдэлээн туран, санаатын атастаһарыгар көрдөстүбүт.

– Баянистар түмсүүлэрин Алексей Потапов илиитигэр ылыаҕыттан, 2019 сылтан, күүскэ үлэлээтэ диэн бэлиэтиибин. Бу сылларга тэрээһин бөҕө ыытылынна. Холбоһукпут аналлаах значоктанна, дастабырыанньаланна. Бу кэмпириэнсийэҕэ култуура миниистиэристибэтиттэн кэлэн кыттыылара холбоһукпут үлэтигэр үтүө түмүктэрдээх буолуо диэн эрэнэбит

Оттон үөрэнээччим Леня Алексеев туһунан аҕыйах тылы этэр буоллахпына, маннык. Харбалаахтааҕы оҕо саадын музыкальнай салайааччыта Виктор Туманов аан бастаан көрөн-үөрэтэн саҕалаабыта. Арассыыйаҕа маннык холобур баарын билбэппин. Дьыссат оҕотун баян курдук уустук инструмеҥҥа үөрэтиини. Онтон оскуолаҕа киирэрин саҕана ийэтэ Ытык Күөлгэ  көһөрөр. Уол бэйэтэ музыкальнай айылҕата үчүгэй. Ол эрэн маннык түгэҥҥэ төрөппүт оруола бастакы турар. Леня ийэтэ оҕотугар кыһамньыта, болҕомтото үтүө түмүгү аҕалла. Оттон учуутал өттүттэн бириэмэни сүтэрбэккэ түргэнник сайыннарыы. Сыл-хонук түргэнник ааһар. Каникулга, өрөбүлгэ сыттаххына, хайдах да үчүгэй оҕо дьоҕурун толору арыйбаккын, сайыннарбаккын. Манна оҕо баҕата, төрөппүт кыһамньыта, учуутал билиитэ, дьаныара – үһүөн бары биир үлэни толоруубут түмүгэ буолар.  СӨ Култууратын диэйэтэлэ Радомир Пантелеймонович Борисов аатынан өрөспүүбүлүкэтээҕи куонкуруска улахан дьоҥҥо улуустартан дьоҕурдаах оҕолорбутун сыанаҕа таһаарыахпыт.

Эдэр көлүөнэ баянистар баар буола туралларыгар анаан буолан ааспыт кэмпириэнсийэ каадыр боппуруоһугар хоннохтоохтук ылсыбытын олус сэргии иһиттим.

Бэлиэтээн этэр буоллахха, олунньу 3 күнүгэр М.Н. Жирков аатынан музыкальнай колледжка СӨ Култууратын диэйэтэлэ Радомир Пантелеймонович Борисов аатынан өрөспүүбүлүкэтээҕи куонкурус буола турар.