Сырдык мөссүөнэ өрүү сүрэхпитигэр

Ааһан эрэр 2025 сыл Патриотизм сылынан биллэриллибитэ. Ахсынньы 9 күнэ — Святой Георгий Георгиевскай кириэс — бу үрдүк байыаннай наҕарааданы кытта Аҕа дойду Дьоруойдарын күнэ бэлиэтэнэр.
Бу күн анал байыаннай дьайыы бэтэрээнэ, гвардия младшай сержана, «Сибэтиэй Георгий» уордьан 4-с истиэпэнин, «Эр санаа» уордьан уонна өлбүтүн кэннэ түһэриллибит иккис «Эр санаа» уордьан кавалера Кэнчээри Олегович Бугуловка үөрэммит оскуолаларыгар, Дьокуускай куоракка уонна Таатта Чычымаҕар өйдөбүнньүк күн буолан ааста.

«Бу операцияттан таҕыстахпытына, дьиэбитигэр уоппускаҕа барыахтаах этибит...» диэн күн сиригэр суох буолбутун түүлүнэн биллэрбит эбит оҕобут барахсан...

Ол эрэн күүтэр, кэтэһэр дьон «син биир барыта этэҥҥэ буолуохтаах» диэн эрэл санаалаах этибит. Хомойуох иһин, оҕобут 2025 сыл муус устар 2 күнүгэр байыаннай сорудахха сылдьан охтубутун туһунан иһитиннэриини туппуппут.

Дьиэ кэргэнигэр Кэнчээри сэттэ оҕоттон саамай кыралара. 1992 сыл кулун тутар 17 күнүгэр Үөһээ Бүлүү оройуонун Дүллүкү нэһилиэгэр күн сирин көрбүтэ. Дьокуускай куорат 14 нүөмэрдээх оскуолатыгар маҥнайгы кылааска киирбитэ. Орто оскуоланы Таатта Чычымаҕар бүтэрбитэ.

Кэнчээри оҕо эрдэҕиттэн туохха барытыгар сыһыаннааҕа. Тугу ылсыста да, бары өттүнэн дэгиттэр буолара – спорка да, муусукаҕа да, ырыаҕа, байыаннай көрүүгэ да барытыгар. Оҕолору түмэр, салайар дьоҕур киниэхэ өрүү баара. Ол да курдук сэрии толоонугар бииргэ сылдьар буойуттарыгар хамандыыр этэ. Оҕо эрдэҕиттэн кырдьаҕаһы кытта кырдьаҕас, эдэри кытта эдэр, дьоҥҥо үтүөнү баҕарар элэккэй, сайаҕас майгылааҕа. Дьиэҕэ киирэн кэллэҕинэ сырдыгынан сыдьаайар сулуспут кини буолара. Бырааттарыгар, балыстарыгар күүтүүлээх таайдара этэ. Элбэх ыра санаалааҕа, үтүөнү, кэрэни оҥорор баҕалааҕа, олоҕун оҥостон, дьиэ кэргэн аҕа баһылыга буолуо этэ. Ону «арай» эрэ диир кыахтаахпыт.

Анал байыаннай дьайыыга мобилизация саҕаламмытыгар «байыаннай сулууспалаах киһи быһыытынан барар эбээһинэһим» диэн бигэ быһаарыныы ылыммыта. Үс сыл анараа өттүгэр, 2022 сыл балаҕан ыйын 26 күнүгэр, дьоно – ийэтэ, бииргэ төрөөбүттэрэ, сиэн оҕолор буолан Кэнчээрибитин   улааппыт, үөрэммит, үлэһит буолбут Дьокуускайыттан анал байыаннай дьайыыга атаарбыппыт.

Сулууспатын кэмигэр иккитэ уоппускаҕа кэлэн барбыта.

Табылыннар эрэ, сибээскэ тахсара. Төһө да уоттаах сэриигэ сырыттар, кэпсэтэригэр, суруйарыгар наар үчүгэйи эрэ ырыҥалыыра. Бииргэ сылдьар уолаттарын кэпсиирэ, наар хамаандатын уолаттарын хайгыыра. Бойобуой доҕордоһуу күүһүн-кыаҕын киниттэн истэрбит.

Оҕобут 2023 сыл атырдьах ыйын 22 күнүгэр Бахмут нэһилиэнньэлээх пууну  ылыыга хамандыыр быһыытынан бэйэтин үчүгэйдик көрдөрөн, «Сибэтиэй Георгий» уордьан 4 истиэпэнинэн, 2024 сыл ыам ыйыгар Краснай уонна Хромово дэриэбинэлэри босхолооһуҥҥа «Эр санаа» уордьаны ылбыта –  сэрии толоонугар хорсуннук сылдьыбытын туоһулара. Бу наҕараадалара, киһи, гражданин быһыытынан хаачыстыбатын туоһулара, биһиэхэ оҕобут сырдык аатын, мөссүөнүн санаталлар.

Бииргэ сылдьыспыт бойобуой доҕотторо кэпсииллэринэн, Суджаны босхолооһун иһин түһэрбит иккис «Эр санаа» уордьана, бэйэтэ «Ыллахпына ыллым» дииринии, хомойуох иһин, тыыннааҕар кэлбэтэҕэ. Анал байыаннай дьайыыга дьоруойдуу охтубут Кэнчээри Бугулов төрөөбүт Сахатын сиригэр көмүс уҥуоҕа көтөҕүллүбүтэ.

Сэтинньи ыйга бииргэ үөрэммит кылааһын оҕолорун көҕүлээһиннэринэн, тэрийиилэринэн Дьокуускай куораттааҕы Саха-политихническай лицейгэ Кэнчээри Бугулов аатынан «Сырдык тыына өрүү сүрэхпитигэр» диэн волейболга табаарыстыы көрсүһүү буолбута. Хас биирдии спортсмеҥҥа анал мэтээл, грамота туттарыллыбыта.

Оттон ахсынньы 9 күнүгэр Дьоруой күнүн чэрчитинэн киниэхэ аналлаах «Дьоруой паартата» арылынна. Маны таһынан Таатта Чычымаҕар анал байыаннай дьайыы кыттыылаахтарыгар аналлаах дуоскаҕа Кэнчээри Бугулов аата оскуола выпускнигын быһыытынан кыһыл көмүс буукубаларынан сурулунна.

Хаартыскалар: Бугуловтар тиксэриилэрэ