Сырдыгы тэйитэр значогу түҥэтэллэр

Балаҕан ыйын саҕаланыытыгар суол хамсааһынын кыттыылаахтарыгар сокуону тутуһалларын уонна эппиэтинэстээх буолалларын көҕүлүүр соруктаах «Засветись» аахсыйа ыытылла турар.

Судаарыстыбаннай бырагыраама сырдатар уонна эрдэттэн сэрэтэр үлэтин чэрчитинэн  ыытыллар аахсыйа Дьокуускай куоракка Доҕордоһуу болуоссатыгар уонна Сынньалаҥ пааркатыгар балаҕан ыйын 3-5 күннэригэр 11.00 чаастан киэһэ 19.00 ч. диэри тэриллэр. Аахсыйа буолар күннэригэр кэлбит хас биирдии кыттааччыны тэрээһин волонтердара көрсөллөр, айан суола кырачаан пассажирдарга, сатыы хаамааччыларга, велосипедистарга куттала суох буоларыгар сүбэлэри биэрэллэр, тематическай буклеттары сэргэ туһалаах сувенирдары – сырдыгы тэйитэр значоктары уонна брелоктары, туттараллар.

Суолга тахсыбыт хас биирдии оҕоҕо – пассажир буоллун, сатыы буоллун, бэлисипиэттээх буоллун –  улахан дьон болҕомтото, кыһамньыта наадатын умнуо суох кэриҥнээхпит: суол быраабылатын үөрэтэн, куттал суох буолуутун экипировкатын туһанарыгар көмөлөһөн, оттон уруулга олорооччу оҕо дьон үмүөрүһэр сирдэригэр ордук болҕомтолоох буолара ирдэнэр.

Хаартыска: ГИБДД ИДьМ Саха сиринээҕи салаатын пуондатыттан