Сырдыгы кэрэһилиир «Сыккыс» саҥа кэллиэксийэ

2025 сылга устуудьуйа «Хотун Бүлүү» арт-эйгэ» бырайыага СӨ Үүнэр көлүөнэтин тус сыаллаах пуондатын уонна «Эльга уголь» промышленнай хампаанньа креативнай уонна тэхиньиичэскэй  кииннэри сайыннарыыга туһаайыллыбыт «ИННОСФЕРА» диэн кыттыгас куонкурустарын кыайыылааҕын үрдүк аатын ылбыта.

«Нарыйа» муода устуудьуйата Хоро орто оскуолатын үөрэнээччилэрин иһинэн 1991 сыллаахха тэриллибитэ. 2014 сылтан образцовай оҕо кэлэктиибин үрдүк аатын сүгэр.

Бу сыллар усталарыгар устуудьуйа иһинэн бэрт элбэх коллекция күн сирин көрөн, улуус,  өрөспүүбүлүкэ, Арассыыйа подиумнарыгар тахсыбыта. Үгүс элбэх көрүү, куонкурус, бэстибээл дипломаннара, лауреаттара.

Устуудьуйа салайааччыта Гюльнара Тарасова, СӨ үөрэҕириитин туйгуна, Арассыыйа үөрэҕириитин бочуоттаах үлэһитэ:

– «Инносфера» гранынан толору хааччыллыылаах кабинеттанаммыт олус үөрбүппүт. Манна 8 иистэнэр, 2 оверлочнай массыына, 3 манекен, 5 таҥас өтүүктүүр колодка, таҥас быһар улахан, полкалардаах остуол, экран, проектор, ноутбук ылыммыппыт.
Бырайыак бырагыраамматыгар оҕону бэйэтин кээмэй ыларга, таҥас быһарга, тигэргэ, эскиз оҥорорго үөрэтии киирэр, сахалыы төрүт таҥас өйдөбүлүн ылаллар. Онон хас биирдии дьарыктанар оҕо иис, муода эйгэтигэр бастакы хардыыларын оҥорор.

Аҕыйах хонуктааҕыта бастакы улахан үлэбитин таһаардыбыт.  Саҥа кэллиэксийэбитин «Сыккыс» диэн ааттаатыбыт. Сыккыс диэн ыраас уулаах үрүйэ, сааскы таммах, ырааһы, сырдыгы кэрэһэлиир диэн өйдөбүллээх.
Оҕолор бэйэлэрэ айбыт, тикпит таҥастарын сүрдээҕин астынан, киэн туттан кэттилэр, көрдөрдүлэр. 

Сып-сырдык, тупсаҕай иистэнэр хоско кыракый кыысчаан кээмэй ыла турар дуоспуруннаах хаартыската олус да киһини долгутта. Бу буоллаҕа эбээт, оҕо кыра сааһыттан иис эйгэтигэр киириитэ. Онно бу курдук грантовай бырайыактар оҕо аймах интэриэһинэн сайыннарыыга күүс-көмө буолаллар.