Сынньалаҥ путевкатын ыларга сэрэниҥ!

Эмсэҕэлээбиттэртэн биирдэстэрэ – 54 саастаах Алдан олохтооҕо – мөлүйүөн аҥаарыттан тахса солкуобайын сүтэрбит. Бу туһунан Арассыыйа ИДьМ-ын Алдан оройуонун пресс-сулууспата иһитиннэрэр. Биэдэмистибэ иһитиннэрбитинэн, ааспыт сыл алтынньы ыйыгар дьахтар кэргэнин кытта Вьетнамҥа сынньанарга быһаарыммыт. Путевка атыылаһар туһугар кини эрдэттэн билэр туроператорын кытта сибээстэһэн, 550 000 солкуобайы төлөөбүт. Ол гынан баран, сынньалаҥнара табыллыбатах.

Бастаан туроператор өр кэмҥэ ирдэнэр докумуоннары биэрбэтэх, онтон олох да сибээстэн сүппүт.

Кэлин эмсэҕэлээччи туроператор бэрэстэбиитэлин атын эрэгийиэҥҥэ туппуттарын сонуннартан истибит. Кини атыыласпыт путевката олох да суох эбитин эмиэ билбит.

Биллибитинэн, сымыйа-туроператортан 300-чэ кэриҥэ Амур уобалаһын, Приморье кыраайын уонна Саха сирин олохтоохторо эмсэҕэлээбиттэр. “Бары түбэлтэҕэ уорбаланааччы айан өҥөтүн иһин килийиэннэриттэн эрдэттэн төлөбүрү ылбыт эрээри, эбэһээтэлистибэлэри толорботох”, — диэн ИДьМ иһитиннэрэр. Уопсай хоромньу 200 мөлүйүөн солкуобайтан тахсыбыт.

Сотору кэминэн сынньалаҥ кэмнэрэ саҕаланаллар, онон полиция үлэһиттэрэ путевка ыларга олохтоохтору сэрэнэллэригэр, болҕомтолоох буолалларыгар ыҥырар.