Сымыйа кафелары «уонна» оннугар «эбэтэр» тылынан бэрээдэктииргэ этиини киллэриэхтэрэ

Мунньахха иһитиннэрбиттэринэн, 2026 сыл атырдьах ыйыгар Дьокуускай куорат үрдүнэн 96 сымыйа кафе үлэлиир. Маннык тэрилтэни кытта ыкса ыаллаһыы, биллэн турар, буруйу оҥоруу, сокуону кэһии төрүөтэ буолар.

ИДьМ статистикатынан, ааһан эрэр сыл 7 ыйыгар киһини соруйан өлөрүү 11, киһи доруобуйатыгар ыарахан эчэйиини оҥорон өлүүгэ тиэрдии 12, киһи доруобуйатыгар ыарахан эчэйиини оҥоруу 45 ыар түбэлтэтэ бэлиэтэммит. Ыйыллыбыт буруйу оҥоруулар 90% арыгыны кытта ситимнээх. 200 киһи тырааныспары итирик туруктаах ыыта сылдьан тутуллубут.

Дьокуускай куорат баһылыга Дмитрий Садовников этиллибит сыыппараларга сигэнэн: «Хас биирдии сыыппара кэннигэр – ким эрэ быстыбыт олоҕо, ийэ хараҕын уута, ыһыллыбыт дьиэ кэргэн. Куорат бүддьүөтүгэр арыгы атыытыттан сылга 130 мөл. солк. киирэрэ муҥ саатар биир киһи олоҕун толуйар дуо?» – диэн ыйытыыны туруорар.

Билиҥҥи сокуон этэринэн, маннык тэрилтэлэри сабарга икки усулуобуйаны тэҥинэн кэһии баар буолуохтаах: сымыйа кафе иэнэ 75 кв. м кыра уонна дьон олорор дьиэтиттэн 50 миэтэрэттэн чугас буолуохтаах. Биирдэстэрэ эмэ тутуһуллар түгэнигэр, бу тэрилтэни сокуон көмүскүүр.

Манан сибээстээн куорат дьаһалтата Ил Түмэҥҥэ бу сокуоҥҥа  «уонна» тылы «эбэтэр» тылынан солбуйан, уларыыны киллэрэргэ этиилээх тахсарга быһаарынна. Ол курдук, сымыйа кафе бу икки усулуобуйаттан биирин эмэ кэһэр түгэнигэр, лицензиятыттан матарын курдук.

Маны сэргэ үөрэх тэрилтэлэрин таһыгар «чөл олох территориятын» биллэрэргэ, Кырдьаҕас куоракка арыгылаах утаҕынан эргиниини хааччахтыырга этиилэр киирдилэр.