Сыллата хатыланар итэҕэстэр

Кулун тутар 25 күнүгэр буолбут Ил Түмэн 18-с пленарнай мунньаҕар СӨ Ааҕар-суоттуур палаататын (мантан салгыы – АСП) 2025 сыллааҕы үлэтин түмүгүн бэрэссэдээтэл Алена Федорова иһитиннэрдэ. Бу туһунан Ил Түмэн пресс-сулууспата тугу суруйбутун салгыы билсиэҕиҥ.

Бэрэбиэркэ чахчыта кэрэһилииринэн, бүддьүөт үбүн туһаныыга сылтан сыл хатыланар кыһалҕалар, кэһиилэр бааллар. Ол курдук, үбүлээһин тэрилтэ иһинээҕи (внутренний финансовый) аудита «кэбирэх” миэстэ буолара тохтуу илик. Бэрэбиэркэни ааспыт бүддьүөт үбүн-харчытын тиһигин кылаабынай администратордарын 60 бырыһыаныгар тэрилтэ иһинээҕи хонтуруол ситэтэ суоҕа бэлиэтэнэр. Ороскуот чааһа сол да тэҥэ суохтук үллэриллэрэ көстөр: тутаах ноҕорууска син биир сыл төрдүс кыбартаалыгар тиксэр. Инньэ гынан ананар үп туттуллубакка хаалар куттала улахан.

“АПК үс кэнники сыл 2,2 млрд солк. ылбыт да, ходуһа иэнэ кэҥээбэт, үлэ миэстэтэ да эбиллибэт. Субсидияны туһанааччылар барыстара көдьүүстээх оҥорон таһаарыыны тэрийбиттэриттэн буолбакка, субсидия ылбыттарын суотугар ситиһиллэр”, – диэн туран, АСП үбүнэн өйөбүлү оҥорон таһаарыы көрдөрүүтүн улаатыннарар интэриэһи көҕүлүүргэ туһаайары сүбэлээбит. Судаарыстыба баайын-дуолун приватизациятын чааһыгар эмиэ кэккэ ыйытыылар баалларын бэлиэтээбиттэр. Актыыптары арааран ылыыга куонкурус процедурата уонна аукцион да туһаныллыбата, оттон ГУП-тан ХЭУо-ҕа көспүт тэрилтэлэр син биир ночооттоох сылдьаллара ахтыллыбыт.

Бэрэбиэркэ салҕанар... эбэтэр АСП хараҕа кыраҕы

Ааҕар-суоттуур палаата бу үүммүт сылга 139 бэрэбиэркэни былаанныыр эбит: 60 хонтуруоллуур, 21 эспиэр-анаарар тэрээһини уонна бэриллибит боломуочуйа чэрчитинэн 50 тэрээһин киирэ сылдьар. Ол иһигэр “СӨ ДьУоХХ” ГУП, чэпчэтиилээх тарыыпка көрүллэр субсидияны, Өрөспүүбүлүкэтээҕи искэн диспансерын, Арктикатааҕы тырааныспар логистикатын, хааһына тэрилтэлэрин көрүөхтэрэ. Ол иһигэр Ил Түмэн сорудаҕынан ыытыллар чопчу тиэмэлээх тэрээһин 3-тэн 8-ка диэри эбиллэр буолбут. Хапытаалынай өрөмүөн пуондатын аудита ыытыллыа. Улуустарга бэриллибит тыа хаһаайыстыбатын оҥорон таһаарыытын өйүүр боломуочуйалары үөрэтэн көрүөхтэрэ.

Бүддьүөт үбүн 32 кылаабынай администратора бары бэрэбиэркэнэн хабыллыахтара.

Бүгүн АСП иһитиннэрбит отчуотуттан сэгэтэн аастыбыт. Кэлэр сырыыга дьокутааттар Ааҕар-суоттуур палаата иһитиннэриитин кэнниттэн тус көрүүлэрин, этиилэрин үллэстибиттэрин билсиэхпит.

(Салгыыта бэчээттэниэ)