Сылгы сылыгар тугу астыахха

Сылгы — сүрдээх кыраһыабай кыыл, хаачыстыбаны сыаналыыр. Олус элбэх майонезтаах салааттартан уонна сыалаах-арыылаах бүлүүдэлэртэн бастакынан кини сибиэһэйи, туһалааҕы уонна эстетиканы талар. Онон сылбыт бэлиэтин бырааһынньык эниэргийэтинэн толорор чэпчэки, минньигэс уонна кыраһыабай бүлүүдэлэринэн үөрдүөххэ.

«Саҕынньахтаах лосось»

Туох наадата:

• кыра туустаах лосось — 200 г

• буспут сүбүөкүлэ — 2 уст.

• буспут моркуоп — 1 уст.

• буспут хортуоппуй — 2 уст.

• күөх дьаабылыка — 1 уст.

• натуральнай йогурт уонна майонез — саппараапкаҕа

• киэргэтиигэ күөх от

Бэлэмнээһинэ:

1. Буспут оҕуруоппут астарын бөдөҥ хайаҕастаах түөркэҕэ анньабыт: хортуоппуйу, моркуобу, сүбүөкүлэни.

2. Лосось балыгы кубиктыы кырбыыбыт. Дьаабылыканы бөдөҥ хайаҕастаах түөркэҕэ анньабыт.

3. Маннык араҥанан уурабыт: хортуоппуй → лосось → моркуоп → дьаабылыка → сүбүөкүлэ.

4. Хас биирдии араҥаны йогурту уонна майонеһы холбоон баран сыбыыбыт (быһа холоон 3:1).

5. Холодильникка 2-3 чаас туруорабыт.

Остуолга биэриэхпит иннинэ күөх отунан, кедр эриэхэтинэн эбэтэр лососьтан роза оҥорон киэргэтиэххэ сөп.

Авокадолаах сымыыт

Туох наадата:

• сымыыт — 6 уст.

• авокадо — 1 уст.

• натуральнай йогурт — 2 ост. нь.

• чеснок — 1 өлүүскэ

• лимон сога, туус, биэрэс — бэйэ сөбүлүүрүнэн

Бэлэмнээһинэ:

1. Сымыыты бүтэйдии буһарабыт, сойутабыт, ыраастаан баран ортотунан быһабыт.

2. Уоһаҕын сэрэнэн ылабыт.

3. Авокадоны сымнаҕас өттүн биилкэнэн илдьиритэбит, сымыыт уоһаҕын, йогурту, чесногу, лимон согун, тууһу, биэрэһи эбэбит. Биир тэҥ гына, крем курдук буолуор диэри булкуйабыт.

4. Оҥоһуллубут маассаны кондитерскай мөһөөччүккэ (эбэтэр көннөрү ньуоскаҕа) кутан баран сымыыппытыгар толору симэбит.

Духуопкаҕа буспут кус эбэтэр эт 

Туох наадата:

• сибиинньэ, куурусса этэ эбэтэр кус

• соус: мүөт + хартыыһа + соевай соус

• эбии: дьаабылыка, розмарин, апельсин цедрата

Бэлэмнээһинэ:

1. Эппитин кырата биир чаас маринуйдуубут, соуска сытыарабыт.

2. Рукавкаҕа эбэтэр фольгаҕа духуопканы 180°С ититэн баран 40 мүнүүтэттэн чаастан ордук кэмҥэ диэри буһарабыт.

3. Бэлэм буолуо 10 мүнүүтэ иннинэ апельсин согун кутабыт— карамель хахтаах буолуо.

Кивины кытта буспут сибиинньэ этэ

Туох наадата:

• сибиинньэ этэ – 500 г

• киви – 2 уст.

• кытаанах сыыр – 150 г

• эриэппэ луук – 1 уст.

• мас арыыта – 3 ост.нь.

• майонез – 100 г

• туус – бэйэ сөбүлүүрүнэн

• хара биэрэс – бэйэ сөбүлүүрүнэн

Бэлэмнээһинэ:

1. Луугу ыраастаан, аҥаардаан баран синньигэс гына кырбыыбыт. Мас арыытыгар саһарчы ыһаарылыыбыт.

2. Кивини хахтаан баран өлүүскэлэргэ быһабыт. Сыыры бөдөҥ хайаҕастаах түөркэҕэ аалабыт.

3. Сибиинньэ этин сантиметр курдук халыҥнаах кырбыыбыт, өтүйэнэн сынньан баран, туустуубут, биэрэстиибит. Икки өттүттэн ыһаарылыыбыт. Духуопка лииһигэр уурабыт, арыытын кутабыт, майонеһынан сотобут, ыһаарыламмыт луукпутун кутабыт, оттон үрдүгэр, хас биирдиитигэр иккилии куһуоччук киви уурабыт. Сыырынан бүрүйэбит уонна 180 кыраадыс ититиллибит духуопкаҕа 20 мүнүүтэ буһара уурабыт.

4. Сибиинньэ этин хортуоппуйу, помидордары уонна оҕурсуну кытта биэрэбит.

«Уоттаах канапе»

Туох наадата:

• быһыллыбыт багет

• иэдьэгэйдээх, күөх оттоох сыыр

• кыра туустаах форель эбэтэр семга

• сибиэһэй оҕурсу

• киэргэтиигэ петрушка

Бэлэмнээһинэ:

1. Багеты тостерга эбэтэр духуопкаҕа уган кыратык саһардан ылабыт.

2. Хас биирдии быһыыны иэдьэгэйдээх сыырынан чараас гына сыбыыбыт.

3. Бастаан оҕурсуну, онтон балыкпытын уурабыт.

4. Петрушка лабаатынан киэргэтэбит.

Кууруссалаах, ананастаах салаат

Туох наадата:

• куурусса куҥ этэ (филе) — 300 г

• кэнсиэрбэлэммит ананас (куһуоччуктар) — 1 бааҥка

• кэнсиэрбэлэммит кукуруза — 1 бааҥка

• кытаанах сыыр — 150 г

• сымыыт — 3 уст.

• чеснок — 1-2 өлүүскэ

• күөх луук — 30 г

• майонез уонна йогурт

Бэлэмнээһинэ:

1. Куурусса этин буһарабыт уонна кубиктыы кырбыыбыт.

2. Буспут сымыыты бөдөҥ хайаҕастаах түөркэҕэ анньабыт.

3. Сыыры бытархай гына түөркэлиибит.

4. Чесногу илдьиритэбит.

5. Барытын булкуйабыт уонна майонезтаах йогуртунан саппараапкалыыбыт.

Аһыытыҥы амтан биэрдин диэн күөх луугу бытархай гына кырбаан салааппытыгар кутабыт.

Имбирдээх парфе

Туох наадата:

• Имбирнэй бэчиэнньэ — 200 г

• «Маскарпоне» сливочнай сыыр эбэтэр онуоха маарынныыр — 400 г

• сакалаат — 90 г

• 20% чөчөгөй— 200 мл

Бэлэмнээһинэ:

1. Имбирнэй бэчиэнньэни бытарытабыт уонна блендергэ үлтүрүтэбит.

2. Чөчөгөйү саахары эбэтэр саахар пудратын кытта булкуйабыт. Сливочнай сыыр эбэбит уонна биир тэҥ буолуор диэри булкуйабыт.

3. Креманкаҕа эбэтэр ыстакааннарга маннык араҥанан уурталыыбыт: сыырдаах маассабыт →
бэчиэнньэ бытархайдара → эмиэ маассабыт. Холодильникка 4–6 чаас угабыт.

4. Сакалааты бытархай түөркэҕэ анньабыт уонна десерпытыгар биэриэхпит иннинэ таммалатабыт.

Имбирдээх парфе тирамисуну санатар. Бу десерт саҥа дьыл киэһэ остуол биир мааны бүлүүдэтэ буолара саарбаҕа суох.

Мүөттээх, имбирдээх грушалар

Туох наадата:

• кытаанах груша (холобур, «конференция») — 4 уст.

• мүөт — 4 ост. нь.

• апельсин аҥаарын сога

• сибиэһэй имбирь — 1 см түгэҕэ (силиһэ)

• грецкэй эриэхэ — остуолга биэрэргэ

• корица — тарбах тутума

Бэлэмнээһинэ:

1. Духуопканы 180℃ ититэбит.

2. Грушалары ыраастыыбыт, аҥаардыыбыт уонна ортотун ылабыт.

3. Буһарар пуормабытыгар грушалары аҥаардаабыт өттүнэн үөһэ уурталыыбыт. Мүөт уонна апельсиммыт согун кутабыт, түөркэлэммит имбири уонна корицаны таммалатабыт.

4. 25–30 мүнүүтэ буһарабыт, грушабыт сымныахтаах уонна карамель курдук буолуохтаах. Тахсыбыт согунан кутабыт.

5. Итиилии биэрэбит, грецкэй эриэхэни бытарытын кутабыт уонна буспут иһититтэн согун ылан эмиэ кутабыт.

Бу аптаах десерты буһардаххытына, дьиэҕит иһэ бырааһынньык сытынан дыргыйыа.