Сылаас тохтобуллары куортамҥа биэрии — куорат бүддьүөтүгэр ноҕоруусканы аччатыы

Сылаас тохтобуллары «Куораттааҕы суол-тырааныспар сулууспата» тэрилтэ көрөр-истэр. Маныаха муниципальнай бүддьүөттэн сыллата балайда харчы көрүллэр: 2025 сылга 8,1 мөл. солк. суумалаах хантараак түһэрсиллибит, 2026 cылга —  11,7 мөл. солк. тахса. Бу туһунан Куорат дууматын мунньаҕар Дьокуускай куораттааҕы Суол-иис инфраструктуратыгар уонна тырааныспарга департамент начаалынньыга Эдуард Садовников иһитиннэрдэ.

Эбийиэктэри электричество уотунан хааччыйыыга эмиэ балайда ороскуот ирдэнэр. Ол кудук, 2026 сыл аҥаардас тохсунньу-олунньу ыйдарыгар электроэнергияҕа 5 мөл. солк. барбыт. Манан сибээстээн, куорат бүддьүөтүгэр ноҕоруусканы аччатар сыалтан, сылаас тохтобуллары арендаҕа биэрии үлэтэ ыытыллар. Ол иһигэр дьокутааттар сылаас тохтобулларга турар монитордары урбаанньыттар угуйуктарыгар куортамныырга этии киллэрдилэр.