Сылаас тохтобулларга атыы-эргиэн туочукатын тэриниэххэ сөп

Дуогабар быһыытынан атыы-эргиэн тохтобул оруобуна аҥаарыгар тэриллиэхтээх. Атын аҥаара пассажирдарга ананыахтаах – ыскаамыйалар туруохтаахтар.

Арыанда дуогабара үс сылга түһэрсиллэр. Урбаанньыт тохтобулу сарсыарда 7:00 чааска арыйыахтаах, 23:00 чааска хатыахтаах, тохтобул павильонун ыраастык тутуохтаах, аттынааҕы сири көрүөхтээх-истиэхтээх. Сылаас тохтобулларга аһы-үөлү, хаһыаты, хаһаайыстыбаннай табаары, акциз көрүллүбэт табаардарын, ону тэҥэ фастфуд астыыр көҥүллэнэр.

Биһиги чопчулаабыппытынан, куортам сыаната биир квадратнай миэтэрэ куорат кытыы сирдэригэр турар тохтобулларга 831 солкуобайтан, киин тохтобулларга 1637 солк. саҕаланар. Аукцион саҕаланар сыаната – 1 ыйга 12,3–16,6 тыһ. солк. куорат киинигэр турар тохтобул арыандата, куорат кытыытыгар – 6,8–9,2 тыһ. солк. буолар.

Сайаапкалары алтынньы 1-2 күнүгэр диэри туталлар, аукцион бэйэтэ сэтинньи 7 күнүгэр буолар.

Санатан эттэххэ, сылаас тохтобуллар алтынньы 1 күнүттэн аһыллыахтара. Дьокуускайга барыта 61 сылаас тохтобул баар. Онтон саамай саҥалара «Звезднай» оройуоҥҥа космонавт Герман Титов аатынан быстах туора уулуссаҕа балаҕан ыйын 11 күнүгэр турбута.

Алтынньы бүтүөр диэри куоракка өссө тоҕус сылаас павильону туруоруохтара, олор истэригэр нэһилиэнньэ куоластааһынынан талбыт сирдэригэр: «4 №-дээх почта » (Сэбиэскэй Аармыйа 50 сыла уул.), «Кыайыы паарката» (Өктөөп 50 сыла автострада), «Патриот» (Очиченко уул.), «Өксөкүлээх Өлөксөй аатынан култуура дьиэтэ» (Дзержинскэй уул.) уонна «Циркэ» (Поярков уул.).