Сыл тутаах бэрэбиэркэлэрэ

Кулун тутар 25 күнүгэр буолбут Ил Түмэн 18-с пленарнай мунньаҕар СӨ Ааҕар-суоттуур палаататын (мантан салгыы – АСП) 2025 сыллааҕы үлэтин түмүгүн бэрэссэдээтэл Алена Федорова иһитиннэрдэ. Бу туһунан Ил Түмэн пресс-сулууспата тугу суруйбутун салгыы билсиэҕиҥ.

Сэрэйиллэрин да курдук, бэрэбиэркэ биир бастакынан хомунаалынай холбоһук тэрилтэлэригэр буолбут. Ол быһыытынан АСП олорго көрүллэр субсидияҕа болҕомтотун хатаабыт. Хас сыл аайы судаарыстыбаннай бүддьүөт ороскуоттаах чааһын 7-тэн 9%-гар диэри кээмэйэ тарыып араастаһыытын сабар сыаллаах субсидияҕа ананар. Ол өйөбүл үп, быһа холуйан, ресурсанан хааччыйар 170 тэрилтэҕэ түҥэтиллэр.

2022-2025 сылларга экономическай суоттабылга тирэҕирэн олохтонор сылытыы энергиятын төлөбүрэ – 57 %, оттон Арктика зонатыгар 84 % үрдээбит. Оттон ол кэмҥэ сылытыы энергиятыгар чэпчэтиилээх тарыып Арассыыйа ФАС нормативын иһинэн эрэ (о.э. 20,7%)  индексацияланар эбит. Ол түмүгэр олохтоох бүддьүөт субсидияҕа аныахтаах ноҕорууската биллэ улаатар.

Саха сирин хомунаалыный холбоһугун тэрилтэлэригэр сыччах биир сылга көрүллэр субсидия уопсай кээмэйэ билигин 60 млрд солк. чугаһаан турар.

Ааҕар-суоттуур палаата сыанабылынан, ДьУоХХ министиэристибэтэ субсидия үбүн дьаһайыы өттүгэр доҕолоҥнуур, о.э.  ситэтэ суохтук үлэлиир.  Ол ымпыгар-чымпыгар тохтообоппут. Быһата, бэрэбиэркэ түмүгүнэн үрдүкү салалта таһымыгар мунньах буолбут.