Сыл сүрүн тэрээһинэ буолара чугаһаата!

Тааттаҕа от ыйын 7-12 күннэригэр буолар Манчаары XXII оонньууларыгар бэлэмнэнии күргүөмнээхтик барар.

Өрөспүүбүлүкэ Баһылыгын таһымыгар сыл сүрүн дьаһалыгар бэлэмнэнии хаамыыта көрүлүннэ. Саҥа тутуулары ыытыы, уунан хааччыйыы, сүүмэрдиир күрэхтэһиилэр, култуурунай бырагыраама болҕомто киинигэр турдулар. Ытык Күөл бөһүөлэгэр 450 миэстэлээх, 100 олорор миэстэлээх интэринээттээх саҥа оскуола, элбэх хайысхалаах спортивнай-чэбдигирдэр комплекс, Чөркөөххө модульнай спорт саалата үлэҕэ киириэхтэрэ. Сүүмэрдээһин түмүгүнэн 1113 киһи оонньууларга кыттар путевкалары ылбыта. Бэс ыйын 20 күнүгэр диэри сүүмэрдиир түһүмэхтэр түмүктэнэннэр, ханнык хамаандалартан кимнээх күрэхтэһэллэрэ толору биллиэҕэ.

“Манчаары оонньууларын” бырагырааматыгар спорт 11 көрүҥэ киирбитэ. Ол курдук, хапсаҕай, мас тардыһыы, атах оонньуута, чэпчэки атлетика, саха многоборьета, хотугу многоборье, хабылык-хаамыска, гиирэ спорда, буулдьанан ытыы, саха оҕунан ытыы уонна ат сүүрдүүтэ болҕомтону тардыахтара.

Тааттаҕа буолар быйылгы “Манчаары оонньууларын” биир сүрүн уратытынан сахалыы ис хоһооннооҕо буолуоҕа. Ытык Тааттаҕа олоҥхоһуттар уутуйан үөскээбиттэрэ, Өксөкүлээх Өлөксөй, Алампа, Ойуунускай, Амма Аччыгыйа, Суорун Омоллоон курдук саха тылын, литературатын, уус-уран айымньыларын төрүттээбит улуу дьоммут, суруйааччылар, бэйиэттэр төрөөбүт-үөскээбит сирдэрэ-дойдулара. Онон, бука бары, олохтоохтор, ыалдьыттар, уу сахалыы өйү-санааны, тылы-өһү тутта, тутуһа сатыахтаахпыт.  Итинник быһаарыыны Саха Өрөспүүбүлүкэтин Бырабыыталыстыбатын терминнэрин хамыыһыйата ылынна. Ыйынньыктар тарҕаннылар. Сахалыы тылы-өһү бастакынан тарҕатааччыларынан биһиги салайааччыларбыт, тэрийээччилэрбит, суруналыыстар, спортсменнар буолуохтара. Ыйынньыктар, бэлиэлэр, күрэхтэһиилэр сахалыы суруллуохтара. Күрэс көрүҥнэрин сахалыы тыллары хото туттан кэпсиэхтээхпит, сырдатыахтаахпыт. Холобур, “спорт” диэн тыл – “күрэс”, “спортсмен” – “күрэсчит”, “многоборье” – “дэгит күрэс”, “тренер” – “дьарыктааччы”, “эрчийээччи”, “соревновательная зона” – “күрэс түһүлгэтэ”, “активный” – көхтөөх” уо.д.а. тылбастаналлар. Саҥарарбытыгар нууччалыы тылы, термини туттуунан үлүһүйүө суохтаахпыт. Бу туһунан өрөспүүбүлүкэ Бырабыыталыстыбатын терминнэрин хамыыһыйатыттан, Баһылай Манчаары аатынан төрүт күрэс киинин салайааччыта, Ил Түмэн дьокутаата Геннадий Васильев суруналыыстары, саха тылын үөрэхтээхтэрин кытта сүбэ мунньахха иһитиннэрдэ. “Манчаары оонньууларын” сахалыы сиэринэн үрдүк тэрээһиннээхтик ыытыы барыбытыттан тутулуктаах.