Сыл бүтүүтэ куоракка 174 кыһыл оптуобус сүүрүөҕэ

Холобур, 5-с №-дээх маршрут икки эрэ саҥа оптуобустаах, онтон 15-һэ – ПАЗ. Ону сэргэ 16, 19 уонна 2 №№-дээх маршруттарга тиэхиньикэ саҥардыллара уолдьаспыт.

Саҥа оптуобустары чааһынай тиэйээччилэр өрөспүүбүлүкэ бүддьүөтүн өйөбүлүнэн лиизининэн ылаллар.

VolgaBus 5270GH мааркалаах 50 аныгылыы оптуобуһу Дьокуускай куоракка анаан таҥыыга сөбүлэҥи баһылык Евгений Григорьев сорудаҕынан солбуйааччыта Владимир Дорожкин бу күһүн Москва куоракка баран түһэрсэн кэлбитэ.

Бу саҥа оптуобустар, олорор 27 миэстэни ааҕан туран, 65 пассажиры тиэйэргэ суоттаммыттар. Ону тэҥэ кэлиэхтээх оптуобустары хоту сир усулуобуйатыгар сөп түбэһиннэрэн икки хос таастыыллар, эбии салоны ититэр тэриллэринэн хааччыйаллар. Оттуктара – билиҥҥи экология ирдэбилигэр эппиэттиир ыгыллыбыт айылҕа гааһа (КПГ).

Онон сыл бүтүөр диэри киин куорат уопсастыбаннай тырааныспарын маршруттарыгар уопсайа 174 кыһыл оптуобус тахсыаҕа.